د کابل پوهنتون د فارمسي پوهنځي کې د درمل د کیفیت د ارزوني روزنیز کورس پرانیستل شو
د درملو د کیفیت د ارزونې روزنیز کورس د لوړو زده کړو وزارت علمي مرستیال ښاغلي لطف الله خیرخوا، د کابل پوهنتون رییس ښاغلي دکتور اسامه عزیز، د فارمسي پوهنځي رییس او استادانو او د پارټیسیپ (Particip) موسسې مسوولانو له لوري پرانیستل شو.
د مراسمو په پیل کې د کابل پوهنتون رئیس ډاکټر اسامه عزیز د پوهنتون په مهمو او اساسي مسایلو خبرې وکړې او د فارمسي پوهنځي د رئیس له نوښت څخه یې مننه وکړه او دا یې د ستایلو او هیله مندۍ وړ وبلله او ویې ویل، چې تر اوسه پورې دې پوهنځي له نورو بنسټونو سره د علمي او عملي کارونو د غوره تر سره کېدنې په موخه څو هوکړه لیکونه لاسلیک کړي دي او دا د مسوولینو د کار او هڅو ښکارندویي کوي او مونږ ورڅخه ملاتړ او ستاینه کوو.
د کابل پوهنتون رئیس ټینګار وکړ، روغتیا د ژوند یوه مهمه او اساسي برخه ده او باید په دې برخه کې له ډېر احتیاط څخه کار واخیستل شي او د هغو کسانو مسوولیت، چې د روغتیا په برخه کې کار کوي، لا زیات او لوی دی او خدای دې مونږ ټولو ته د دې توفیق راکړي، چې د خپل وطن او خلکو ته په اخلاص او صداقت خدمت وکړو.
په دې مراسمو کې د لوړو زده کړو وزارت علمي مرستیال ښاغلي لطف الله خیرخواه هم خبرې وکړې او د کابل پوهنتون علمي او مسلکي فعالیتونه یې وستایل او له مسوولینو یې وغوښتل، چې د علمي اثارو محتوا ته زیاته پاملرنه وکړي. ښاغلي خیرخواه همدا راز وویل، چې د درملنې او درملو په برخه کې ستونزې شته او هیله لرو، چې دغه ډول علمي او عملي کارونه د یادو ستونزو په حل کې اغېزمن تمام شي.
د فارمسي پوهنځي رییس پوهنوال اقامحمد ژکفر او د پارټیسیپ موسسې رییس ډاکټر سید رحیم عرب هم د موضوع په هکله خبرې وکړې او تاکید یې وکړ، چې هغوی به قدم په قدم د درملو د کیفیت ارزونه د انالستانو او محصلینو له لوري و څارل شي.
د دې روزنیز کورس موخه د درملو د کیفیت ارزول، د هیواد په دولتي او خصوصي سکتور کې د ادویې د کیفیت له ښه والي سره مرسته کول او د « هیواد د عامې روغتیا وزارت سره د دولتي او خصوصي سکتور کې د اساسي درملو د کیفیت په اړه د دقیقو معلوماتو شریکول» دي.
