د کابل پوهنتون رییس په کابل کې د ترکیې سفیر سره وکتل

د کابل پوهنتون رییس ښاغلي دکتور اسامه عزیز  په داسې حال کې، چې مولوي محمد علم حقاني هم حضور درلود د روان کال د کب په ۲۱ د شنبې په ورځ په کابل کې د ترکیې هیواد سفیر ښاغلي جیهاد ایرګینای سره په خپل کاري دفترکې وکتل. پدې لیدنه کې د دواړو هیوادونو ترکیې او افغانستان تر منځ متقابلو علمي او فرهنګي همکاریو، د کابل پوهنتون او ترکیې د علمي-فرهنګي مرکزونو ترمنځ همکاري او د دواړ لورو څخه یې د دې اړیکو په پياوړتیا او پرمختیا خبرې وکړې.  

پدې لیدنه کې دترکیې سفیر وویل: ترکیه مینه واله ده، چې له افغانستان سره په ټولو برخو په ځانګړي توګه د لوړو زده کړو په برخه کې خپله همکاري زیاته کړي او د زده کړو او تحصیلي بورسیې او همدارنګه د کابل پوهنتون د ماسټري او دوکټورا دورې محصلینو او استادانو ته انلاین درسونه برابر کړي. د ترکیې سفیر زیاته کړه، چې پدې برخه کې یې د لوړو زده کړو له وزیر سره خبرې کړي او په پام کې ده، چې ‌‌‌‌‌‌ډېر ژر به د ترکیې هیواد د بورسیو مرستیال کابل ته راشي او مونږ هیله لرو ، چې وکولای شو  د کابل پوهنتون استادانو لپاره زیاتې بورسیې په پام کې ونیسو.

همدارنګه پدې لیدنه کې د ترکیې سفیر وویل، چې دوی په پام کې لري د یونس امره انسټيټوټ له لوري، چې په کابل پوهنتون کې واقع دی د ژبو او ادبیاتو پوهنځي په ځانګړی توګه د دې پوهنتون د ترکي ژبو او ادبیاتو له څانګې سره لکه د تېر په څېر  خپلو همکاریو ته دوام ورکړي او د خپل توان په اندازه د علمي او اکا‌‌‌‌‌‌ډمیک توان د لوړوالي او همدارنګه د فرهنګي، کلتوري او علمي فعالیتونو د پراختیا لپاره به هم له کابل پوهنتون سره همکاري وکړي.

وروسته د کابل پوهنتون رییس ښاغلي دکتور اسامه عزیز د افغانستان له علمي او فرهنګي بنسټونو سره په ځانګړي توګه له کابل پوهنتون سره یې د ترکیې هیواد علمي او فرهنګي همکاریو څخه د مننې ترڅنګ، دواړه هیوادونه افغانستان او ترکیه یې ښه دوستان یاد کړل او ویې ویل، چې دا دواړه دیني، نژادي، تاریخي گډ مشترکات لري او د دې همکاریو د دوام او پراختیا غوښتونکی شو او دا یې د دواړو لورو لپاره ګټور  بیان کړل.  د کابل پوهنتون رییس زیاته کړه، چې په اوسني وضعیت کې د افغانستان د خلکو لپاره د ترکیې هیواد مرستې او همکاري د دې هیواد د ښه نیت او نظر ښکارندویي کوي، چې مونږ. د زړه له تله ورڅخه مننه کوو.

په پای کې دکابل پوهنتون رییس او د ترکیې سفیر  "دترکیې دښکلاووعکاسي نندارتون"،چې دکابل پوهنتون دبهرنیو ژبو او ادبیاتوپوهنځي ترکي څانګه کې جوړشوی ووهم لیدنه وکړه. پدې نندارتون کې دکابل پوهنتون رییس اودترکیې سفیر  هریوپه خپل وارسره خبرې وکړې اوددې‌‌‌‌‌‌ډول نندارتونونوجوړولیې ددواړوهیوادونودفرهنګي اوهنري اړیکوپه پراختیا اوټينګښت کې مهم قدم یاد اود ورته برناموپه جوړولویې تاکیدوکړ. 

ترکیه دهغوهیوادونوله‌‌‌‌‌‌ډلې څخه دی،چې له افغانستان سره یې په مختلفوبرخوکې همکاري اومرسته کړېده.