د کابل پوهنتون خدماتي کارکوونکو ته خوراکي توکي وویشل شول
څلور قلمه خوراکي توکي، چې اوړه، غوړي، بوره او چای شامل وو، د پنجشنبې په ورځ د کابل پوهنتون د مالي او اداري مرستیالي سرپرست سره په همغږۍ او حضور کې د "ستاره صبح" موسسې له لوري د دې پوهنتون خدماتي کارمندانو ته وویشل.
د یادو توکو د ویش په غونډه کې د کابل پوهنتون مالي او اداري معاونیت سرپرست مولوي عبدالحکیم قاسمي د ستاره صبح موسسې د مرستو څخه د مننې ترڅنګ یې د ورته نورو مرستو غوښتنه وکړه او ویې ویل، چې د کابل پوهنتون کارګران او کارمندان په اوسنیو سختو شرایطو کې مرستې او همکاري ته اړتیا لري.
همدارنګه پدې غونډه کې د ستاره صبح موسسې مسوول نظیف الله احمدزي وویل، چې له 2008 کال راهیسې له کابل پوهنتون سره په مختلفو برخو کې همکاري لري او تر دې وروسته به هم خپلو همکاریو ته دوام ورکوي. ښاغلي احمدزي زیاته کړه، چې د کابل پوهنتون کارمندانو سره به په نژدې راتلونکې کې یوه اندازه نوره د خوراکي توکي مرسته وکړي.
د یادونې وړ ده، چې د ستاره صبح موسسې مرسته شوي خوراکي توکي د کابل پوهنتون د پوهنځیو او شعباتو د شپې پاتې کېدونکو ۹۸ تنو ته ورکړل شول.
