د کابل پوهنتون علمي شورا نوبتي ناسته جوړه شوه
د کابل پوهنتون علمي شورا نوبتي ناسته د روان کال د غبرګولي په ۲۴ نېټه د رییس او د هغه د مرستیالانو، د پوهنځیو د رییسانو او د دې شورا د نورو غړو په ګ‌‌‌‌‌‌ډون جوړه شوه.
د کابل پوهنتون رییس ښاغلي دکتور اسامه عزیز د دې ناستې په پرانیسته کې د ځينو پوهنځیو د ورکشاپونو، نندارتونونو په جوړولو، د هوکړه لیکونو لاسلیک او نورو علمي برخو کې یې ترې ستاینه وکړه او تاکید یې وکړ، چې دا موضوعات د پوهنتون د پرمختګ سبب کیږي او مثبت اغېز لري او مونږ. هیله مندوي، چې ورځ په ورځ د غوره والي په لوري روان یو او هیله لرو، چې نور پوهنځي هم ورته نوښتونه تر لاس لاندې ونیسي.
د کابل پوهنتون رییس همدارنګه په کابل پوهنتون کې د اسلامي اداب او شئون په پام کې ونیسي او په یو شمېر نورو اړوندو موضوعاتو یې خبرې وکړې او د علمي شورا له نورو غړو څخه یې وغوښتل، چې هر یو د خپل مسوولیت ته په پاملرنې سره د هغو د ښه والي لپاره هڅه وکړي.
د علمي شورا پدې ناسته کې د پوهنتون مالي او اداري مرستیال ښاغلي مولوي معلم احمد حقاني د ۱۴۰۱ هـ ل کال بودجه وړاندې او په اړه یې د ناستو غړو ته وضاحت ورکړ، د پوهنځیو له رییسانو او مسوولینو څخه یې وغوښتل، چې بودجې ته په کتو خپلې اړتیا برابرې او هغوی ته یې ولیږي تر څو د هغه پر بنسټ کار تر سره شي.
همدارنګه پدې ناسته کې د اجن‌‌‌‌‌‌ډا په پاتې مسایلو خبرې اترې او نظرونه شریک شول او په هر یو د قوانینو، مقرراتو او کړنلارو مطابق اړین تصمیمونه ونیول شول.
