د کابل پوهنتون په کرنې پوهنځي کې د غنمو سکتور ارزونې دوه ورځينی ورکشاپ جوړ شو
غنم زمونږ د هیواد یو له سټراټیژیکو پيداوارو څخه دي، چې د غذايي مصئونیت لپاره مهم شمېرل کیږي. افغانستان له کلونو راهیسې هڅه کړې ده تر څو د غنمو د تولید په برخه کې ځان بسیايينې ته ورسیږي؛ یواځې دانه، چې خپلو موخو ته ندی رسېدلای، بلکې د وخت په تېرېدو سره مو هیواد د اوړو وارداتو باندې متکي شوی دی.
بې ثباتي د غمنو بیې په نړۍ والو بازارونو کې، په داخلي بازارونو کې د غنمو او اوړو بیې اغېزمنوي، چې په پایله کې خوړو ته د نادارو کورنیو لاسرسی محدوديږي.
کابل پوهنتون هڅه کړې ده تر څو د دې ستونزې د حل په موخه د یوې پالیسي طرحه جوړه کړي او د نظام اړوندې برخې ته یې وړاندې کړي. پدې توګه د کابل پوهنتون د کرنې پوهنځي ته دنده وسپارل شوه تر څو د غنمو د تولید په برخه کې ځان بسیایینې ته د رسېدو لپاره په یوې هر اړخیزې طرحې کار وکړي. د دې غوښتنې سره په یو وخت یاد پوهنځي د غنمو په سکتور کې د ستونزو د ارزونې ورکشاپ جوړ کړ. دا ورکشاپ د غبرګولي په ۱۷ نېټه د کرنې پوهنځي د کنفرانسونو په تالار کې د کابل پوهنتون د رهبري، استادانو، د کرنې وزارت او د کرنیزې څېړې انستیټوټ د مسولینو په ګډون پرانیستل شو.
یاد ورکشاپ د قرانکریم په مبارکو ایاتونو په تلاوت سره پيل او د کرنې پوهنځي رییس ښاغلي پوهاند غلام رسول فیضي لومړی خبرې وکړې او د ورکشاپ ارزښت یې بیان کړ.
وروسته د کابل پوهنتون رییس ښاغلي داکټر اسامه عزیز خپلې پرانیستې خبرې وکړې او د ورکشاپ د انګېزې او موخې په هکله یې ګډون کوونکو ته وضاحت ورکړ. وروسته د کابل پوهنتون علمي مرستیال پوهاند محمد شفیع شریفي خبرې وکړي او ګډون کوونکو ته یې د غنمو سکتور پالیسي جوړولو د اهمیت په هکله معلومات ورکړل.
د کرنې وزارت د زراعتي څېړنې انستیتوت رییس ښاغلي مولوي نصرت الله طلحه د وروستي ویناوال په توګه یې د موضوع د اهمیت په هکله لنډې خبرې وکړې.
د پرانیستې برخې ویناوالو وروسته، د ورکشاپ برابرونکي ښاغلي پوهندوی ډاکټر نجیب الله حسن زوی خپل پرېزنټېشن وړاندې کړ او د دې ورکشاپ موخې او مقاصد یې په مفصله توګه بیان کړل.
پدې توګه ګډون کوونکي په درې ګروپونو وویشل شول او په عملي توګه ورکشاپ پيل شو، چې دوه ورځې به دوام وکړي او په پای کې به د غنمو سکتور ستونزو پالیسي او ځان بسیاینې ته د رسېدو طرحه جوړیږي.
