د افغانستان لپاره د اروپايي ټولنې ځانګړي استازي د کابل پوهنتون له رییس سره وکتل
د کابل پوهنتون رییس ښاغلي دکتور اسامه عزیز سره د روان کال د کب په ۲۵ د چهارشنبې په ورځ د افغانستان لپاره د اروپایي ټولنې ځانګړي استازي توماس نیکلسون او مل پلاوي سره، چې کابل پوهنتون ته راغلي وو، د خپل کار په دفتر کې وکتل.
پدې لیدنه کې د کابل پوهنتون رییس، پوهنتون ته د اروپایي اتحادیي ځانګړي استازي راتګ ته ښه راغلاست وویل، د درسونو د پيل او د دې اتحادیې او علمي بنسټونو سره د اړیکو ټينګښت باندې یې خبرې وکړې او زیاته یې کړه، چې مونږ غواړو د تېر په څېر په اکادمیک میدان کې هم له نړۍ سره اړیکې ولرو او دې ته هیله مند یو خو په اوس وخت کې له افغانستان سره نړۍ والې مرستې په بشري برخې پورې محدودې دي ولې افغانان په اوس وخت کې، لکه څنګه چې لومړنیو موادو ته اړتیا لري؛ تعلیم او تحصیل ته هم اړتیا لري او دا مسئله دا ایجابوي، چې دا دوه میدانه له یو بل څخه جلا نشي او په تحصیلي برخه کې هم له افغان ملت سره همکاري وشي.
په دې لیدنه کې د افغانستان لپاره د اروپايي اتحادیې ځانګړي استازي توماس نیکلسون د پوهنتون د درسونو د پيل او په هیواد کې د لوړو زده کړو د اهمیت او لوړ مقام په هکله د مثبت نظر د بیان او کابل پوهنتون ته په راتګ یې خوښي وښوده او د بیا رغونې، پرمحتګ او پدې پوهنتون کې یې د شته ننګونو د حل د همکارۍ وعده وکړه.
