د کابل پوهنتون د فارمسي پوهنځي او د ابن سینا فارمسي دولتي شرکت ترمنځ هوکړه لیک لاسلیک شو
د کابل پوهنتون د فارمسي پوهنځي د کابل پوهنتون د رییس ښاغلي دکتور اسامه عزیز او د پوهنتون علمي مرستیال پوهاند محمد شفیع شریفي په حضور کې د روان کال د غبرګولي په ۹ نېټه د ابن سینا فارمسي دولتي سرکت سره د علمي او مسلکي همکاریو دتامین په موخه هوکړه لیک لاسلیک کړ.
د کابل پوهنتون رییس ښاغلي دکتور اسامه عزیز د دې هوکړه لیک د لاسلیک په غونډه کې يې د اسلام له نظره د روغتیا او ژوند په موضوع د خبرو ترڅنګ یې دا علمي او مسلکي همکاري نیکه او غوره وبلله او زیاته یې کړه، چې دا کار غوره دی؛ ځکه علمي نظریات په عملي ساحه کې پلي کوي او د ابن سینا دولتي شرکت او د فارمسي پوهنځی خپلې موخې په غوره ډول تر لاسه کوي او له بل لوري په هیواد کې د درملو د تولید په برخه کې ځان بسیاینې ته نژدې کیږو او دا د ارزښت او اهمیت وړ امر دی او زه هیله لرم، چې دا هوکړه لیک ګټور واقع شي او ذکر سوي جزیات پکې په پوره ډول پلي شي او محصلینو ته د وړتیاوو د لوړولو په برخه ګټور واقع شي.
همدارنګه پدې غونډه کې د ابن سینا دولتي شرکت رییس ډاکټر طارق خالد د دې هوکړه لیک په لاسلیک یې خوښي وښوده او ویې ویل، چې دا شرکت پراختیا ته اړتیا لري او پدې دلیل خپل ټول امکانات د هوکړه لیک په پلي کولو کې کاروي.
د فارمسي پوهنځي رییس پوهنوال داکتر آقا محمد ژکفر هم د دې هوکړه لیک لاسیک یو مثبت او مهم ګام یاد کړ او زیاته یې کړه، چې دا پوهنځی ویاړ لري، چې د ا.ا.ا تر راتګ وروسته یې له اکاډمیکو بنسټونو، اړوندو موسسو او ادارو سره یې څو هوکړه لیکونه لاسلیک کړي او نن ورځ هم د یوې بلې هوکړې د لاسلیک ساهدان یاستی او مونږ د هوکړه لیک د موادو پلي کېدو او طرحې ته متعهد یو.
