د لوړو زده کړو د پياوړتيا ملي کنفرانس په کابل پوهنتون کې پیل شو
د لوړو زده کړو د پياوړتيا ملي کنفرانس د کابل پوهنتون په نوى اډېټوريم کې پيل شو٠ ياد کنفرانس د کابل پوهنتون لخواء او د لوړو زده کړو وزارت په همکارۍ ترسره کېږي چې درى ورځې به دوام وکړي.
د دغه کنفرانس په پرانيستو مراسمو کې د نظام لوړ رتبه چارواکو هر يوه ښاغلي مولوي نورالحق انور، د چارو د ادارې لوى رٸيس، ښاغلي شيخ مولوي نداء محمد نديم، د لوړو زده کړو وزارت سرپرست وزير، ښاغلي ډاکټر قلندر عباد، د عامې روغتيا وزارت سرپرست وزير، د کورنيو چارو، لوړو زده کړو، اطلاعاتو او کلتور وزارتونو معين صاحبانو ګډون کړى وو.
لومړى د کابل پوهنتون رٸيس ښاغلي دکتور اسامه عزيز ټولو مېلمنو او د کنفرانس ګډونوالو ته ښه راغلاست ووايه او د ياد کنفرانس د اهميت په اړه يې هر اړخيز معلومات وړاندې کړل.
نوموړي ټينګار وکړ چې د زده کړه ييز نظام د پياوړتيا څخه بغير د نظام په نورو برخو کې پرمختګ ناشونی دی.
دکتور عزيز همدارنګه زياته کړه چې ددغه ملي کنفرانس څخه مو موخه د استادانو، متخصصانو او پوهانو راټولول دي تر څو خپل نظرونه، وړانديزونه او تجربې د زده کړه ييز نظام د پياوړتيا په اړه مطرح او هغه ستونزو ته چې په ياد سيستم کې شتون لري د حل لارې پيدا کړي٠ نوموړي وويل چې دا د کار شروع ده او موږ ژمن يو چې د دا ډول علمي کارونو لړی به روانه وساتو.
ښاغلي شيخ مولوي نداء محمد نديم، د لوړو زده کړو سرپرست وزير د کابل پوهنتون د دغه ستر ابتکار ستاينه او هيله يې څرګنده کړه چې د دغه کنفرانس څخه ترلاسه کېدونکې پايلې به د زده کړه ييز نظام د پياوړتيا سبب شي٠ نوموړي د دا ډول علمي پروګرامونو پر دوام د ټينګار تر څنګ وويل چې د هېواد د زده کړه ييز نظام د پياوړتيا او استادانو د ستونزو د حل په موخه به د خپل توان ترحده هڅه وکړي.
پدغه ملي کنفرانس کې همدارنګه ښاغلي مولوي نورالحق انور، د چارو د ادارې لوى رٸيس خبرې وکړې او استادان يې د ټولنې سترګې او څيراغونه وبلل٠ نوموړي وويل چې موږ له يوې تاريخي او سختې مرحلې څخه د تېرېدو په حال کې يو او د نظام رهبري د استادانو پر ظرفيت او لياقت پوره باور او اعتماد لري.
همدارنګه ښاغلي ډاکټر قلندر عباد، د عامې روغتيا سرپرست وزير، ښاغلي مولوي عتيق الله عزيزي، د اطلاعاتو او کلتور وزارت معين، ښاغلي مولوي محمد نبي عمري، د کورنيو چارو وزارت معين او ښاغلي لطف الله خيرخواه د لوړو زده کړو وزارت معين ددغه کنفرانس له داٸرېدو د هر کلي ترڅنګ د هېواد د زده کړه ييز نظام د پياوړتيا په اړه خبرې وکړې.
پدغه کنفرانس کې د هېواد د ټولو دولتي او خصوصي پوهنتونونو څخه څه باندې زرو تنو استادانو ګډون درلود او تر دريو ورځو پورې به دوام وکړي.
ددغه کنفرانس لپاره لسګونه تحقيقي مقالې لکه د تضمين کيفيت، نصاب، علمي څېړنو، الکترونيکې زده کړو او نورو اړونده مسايلو په اړه د هېواد د زده کړه ييز نظام د پياوړتيا په موخه را ټولې شوې وې چې د کنفرانس د ګډونوالو په شتون کې به وړاندې شي.
