د کابل پوهنتون په انګړ کې د کابل ښاروال، د کابل پوهنتون رییس او د چاپېریال ساتنې ملي ادارې رییس په حضور سره د نیالګیو ملي کمپاین پیل شو
د کابل ښاروال داوود سلطانزوی، د کابل پوهنتون رییس پوهاند دکتور محمد عثمان بابري او د چاپېریال ساتنې ملي ادارې رییس شاه زمان میوندي په داسې کال کې، چې د کابل ښاروالي مرستیال او کارکوونکو، د کابل پوهنتون پوهنځیو رییسانو او یو شمېر استادانو په ګډون د کابل پوهنتون په ښکلي انګړ کې د نیالګیو ایښودو ملي کمپاین د یو شمېر نیالګيو په ايښودلو سره پیل کړ.
د کابل پوهنتون رییس پوهاند دکتور محمد عثمان بابري، د کابل ښاروال ښاغلي داوود سلطانزوی او د چاپېریال ساتنې ملي ادارې رییس شاه زمان میوندي د دې کمپاین د پرانیستي په مراسمو کې، چې د کابل پوهنتون په زرغونه او ښکلې سیمه کې جوړ شوي وو خبرې وکړې او هر یو د چاپېریال په ساتنې او ښکلا، د هوا پاکوالي او د یو ښار ښکلي کولو کې د نیالګیو په ایښودو تاکید وکړ. دوی په خپلو خبرو کې د برنامې له ګډون کوونکو او له هیوادوالو څخه وغوښتل تر څو له دې ملي کمپاین سره یو ځای شي او هر یو د يوه نیالګي په ايښودلو سره د ښار او هیواد په ښکلا کې خپل رول ولوبوي.
دا په داسې کال کې ده، چې په تېرو ورځو کې د کابل پوهنتون رهبري او سرسبزي کارمندانو له لوري د کابل پوهنتون په شنه سیمه کې د نیالګیو ايښودو ملي کمپاین څخه ملاتړ او پسرلي ته د ښه راغلاست په موخه ۱۰۰۰ نیالګي کيښودل شول.
