د فزیک پوهنځي ۱ شمېره تالار د پوهاند محمدظاهر ستانیزي په نوم ونومول شو او د دې پوهنځي د متقاعدو استادانو څخه ستاینه وشوه
د کابل پوهنتون د فزیک پوهنځي ۱شمېره تالار د یوې غونډې په لړ کې، چې د ۱۳۹۹ د کب په ۱۱ نېټه د دوشنبې په ورځ د پوهنتون د رییس او مرستیالانو، د ځینو پوهنځيو رییسانو، د کابل پوهنتون یو شمېر استادانو او محصلینو په ګډون ” د پوهاند محمد ظاهر ستانیزي “ په نوم ونومول شو. همدارنګه د فزیک پوهنځي د ریاست له لوري د ستاینلیک او یوې- یوې وطني چپنې پر ورکړې سره یې د دې پوهنځي د دوه متقاعدو استادانو له کارونو څخه ستاینه وکړه.
پدې غونډه کې د کابل پوهنتون رییس پوهاند دکتور محمد عثمان بابري او پوهاند زلمي احمدزي خبرې وکړې او د مرحوم پوهاند محمد ظاهر ستانیزي او د دې پوهنځي د نورو مخکنیو او متقاعدو استادانو له کارونو څخه یې په نیکي یادونه وکړه او د هغوی د خدمتونو ستاینه یې وکړه. مرحوم پوهاند ستانیزي د کابل پوهنتون د ساینس پخواني پوهنځي کې تقریبآ ۴۴ کال استادي (اوس په څلورو جلا پوهنځیو ویشل شوی) په ۱۳۹۷ کې د ورپېښې ناروغۍ له امله وفات شو. نوموړي د خپلې استادي په دوره کې د فزیک پوهنځي زرګونو زده کړیالانو ته تدریس ورکړی، د نهو په شاوخوا کې ممد علمي اثرونه د فزیک څانګې مینه والو ته میراث پريښي او همدارنګه د زیات وخت لپاره د تدریس ترڅنګ یې په اداري برخو لکه د ساینس پوهنځي د فزیک څانګې د امر، د کابل پوهنتون د ساینس پوهنځي رییس، د کابل پوهنتون علمي مرستیال او د لوړو زده کړو وزارت د ازموینو کمېټې د رییس په توګه یې دندې تر سره کړي دي.
د فزیک پوهنځي استادانو او مسوولینو د کابل پوهنتون رهبري شورا ته د یو وړاندیز په لړ کې د دې پوهنځي ۱ شمېره تالار د نوموړي په نوم ونوموي، چې دا وړاندیز د پوهنتون د رهبري شورا تر تصویب وروسته د پوهاند محمد ظاهر ستانیزي په نوم ونومول شو.
