په کابل پوهنتون کې د ککړې هوا د تصفیه کېدو اختراع شوی فیلتر نندارې ته وړاندې شو
نوموړی فیلتر د لوړو زده کړو وزارت معلوماتي تکنالوژۍ ریاست په مرسته د انجینر سیدزمان سعادت لخوا اختراع او جوړ شوی دی، ددې فلتر د نندارې په غونډه کې د لوړو زده کړو وزارت مرستیالانوو رئیسانو د کابل پوهنتون رهبرۍ او د چاپېریال ساتنې پوهنځي محصلینو برخه اخیستې وه.
د کابل پوهنتون په استازیتوب د چاپېریال ساتنې پوهنځي رئیس پوهندوی محمد داوود شېرزاد د یاد فیلتر جوړونه او اختراع د پوهنتون لپاره مثبت حرکت او غوره لاسته راوړنه وبلله او ټینګاریې وکړ، که چیرې د هېواد محصلینو او ځوانانو ته فرصت او امکانات برابر شي، د تکنالوژۍ او نورومسایلو په برخه کې به لا پرمختګ وکړي.
په یاده غونډه کې د لوړوزده کړو وزارت معلوماتي تکنالوژۍ رئیس ښاغلی انجینر احمدضیاء جبارخیل د تکنالوژۍ په ارزښت او د هغه په اړتیا خبرې وکړې، او زیاته یې کړه، چې نوموړی فیلتر په کم وقت او کم لګښت جوړ شوی، چې دنظام او خلکو لپاره به ګټور تمام شي.
وروسته د یاد فیلتر جووړونکي انجینر سید زمان سعادت وویل، چې هغوی به په راتلونکي کې دې ډول نورو فیلترونو او د تکنالوژۍ وسایلو په جوړولو کې هڅې وکړي.
ښاغلي سعادت د نظام له چارواکو څخه وغوښتل، چې په دې برخه کې د دوی مالي او معنوي ملاتړ وکړي، ترڅو په پوره علاقه او انرژي کار وکړي.
یاد فیلتر په یوه ثانیه کې (400) متر مکعب ککړه هوا پاکوي، د دې ماشین د جوړېدو کار په دوه میاشتو کې بشپړ او دری لکه افغانیو لګښت پرې شوی، یاد ماشین په سیار او هم په ساکن ډول فعالیت کولای شي.
