د کابل پوهنتون فارمسي پوهنځي کې په نړیوالو ژورنالونو کې د څېړنیزو او علمي مقالو لیکلو او خپرولو تر عنوان لاندې سمینار دائر شو
د کابل پوهنتون فارمسي پوهنځي کنفرانسونو تالار کې په نړیوالو ژورنالونو کې د څېړنیزو او علمي مقالو د لیکلو او خپرولو طریقو په اړه د فارمسي پوهنځي د الکترونیکي زده کړو مدیریت کمیټې په مرسته سمینار دائر شو، چې پدغه سمینار کې د پوهنځي رئیس او استادانو ګډون درلود.
په یاد سمینار کې د فارمسي پوهنځي فارمکولوژي څانګې د علمي کدر غړي ښاغلي پوهنمل احمد تمیم غفاري په نړیوالو ژورنالونو کې د څېړنیزو او علمې مقالو د لیکلو او خپرولو په څرنګوالي او مراحلو ګډونوالو ته په تفصیل سره خبرې وکړې.همدارنګه نوموړي زیاته کړه هغه څېړنه چې پرته له خپرېدو ترسره شي بې ګټې ده، موږ باید په نړیوالو ژورنالونو کې د خپلو مقالو د خپرولو په برخه کې د مسلکي کېدو هڅه وکړو.
د فارمسي پوهنځي رئیس ښاغلي پوهنوال آقا محمد ژکفر ددې سمینار موخه د استادانو د مهارتونو او علمي کچې لوړول یاد کړ او زیاته یې کړه، چې په راتلونکي کې به د پوهنتون په سطحه دا ډول سمینار دائر شي.