د کابل پوهنتون اقتصاد پوهنځي د دې پوهنځي متقاعدو او پخوانیو استادانو له کارونو څخه نمانځنه وکړه
د کابل پوهنتون د اقتصاد پوهنځي رهبري هیئت د یو محفل په لړ کې د روان کال د لیندۍ میاشتې په ۳۰ نېټه د یوې غونډې په لړ کې د کابل پوهنتون او اقتصاد پوهنځي د رهبري هیئت په شتون کې، چې د دې پوهنځي په تالار کې جوړه شوې وه، د دې پوهنځي ۱۲ تنو متقاعدو او پخوانیو استادانو ته د ستاینلیک په ورکولو د هغوی له ارزښتمندو کارونو څخه ستاینه وشوه.
دا برنامه د اقتصاد پوهنځي رییس پوهنمل امیرحمزه اسلمي په خبرو پیل او په پيل کې د دې برنامې جوړېدو خوښي او ګډونوالو ته ښه راغلاست وویل، د دې غونډې د جوړېدو انګېزې او د اقتصاد پوهنځي په پیاوړتیا کې د دې استادانو په رول خبرې وکړې او په دوام یې د کلتوري کمېټې رییس او د اقتصاد پوهنځي استاد پوهنیار فضل احمد جویا د خپلو خبرو په لړ کې د کابل پوهنتون داقتصاد پوهنځي لنډ تاریخ، د دې بنسټ د فعالیتونو پر مهال رامنځته شوي بدلونونه او د مسلکي او تخصصي پرسونل په روزنه کې د دې پوهنځي د پخوانیو استادانو اهمیت او رول بیان کړ.
وروسته د کابل پوهنتون رییس پوهاند دکتور محمد عثمان بابري د ښه راغلاست ترڅنګ یې د دې ارزښتمندې غونډې په جوړېدو خوښي وښوده او دا یې د کابل غوره پوهنتون کې یو غوره او منل شوی سنت یاد کړ. پوهاند بابري وویل: کابل پوهنتون د اکاډمیک او یو ژوندي چاپېریال په توګه، په علم او پوهه سمبال او غني دی، چې دا غنیتوب د دا ډول ريښتینو او وطندوسته شخصیتونو د کارونو او زحمتونو منندوی دی. دوکتور بابري زیاته کړه، استادانو ته د درناوي او د متقاعدو او پخوانیو استادانو له پوهې او وړتیاوو څخه د ګټې اخیستنې او په پوهنتون کې د دوی د شتون د امکاناتو په لایحو کار روان دی تر څو له دې لارې د استادانو د لوړ مقام درناوي ترڅنګ د دوی له باارزښته پوهې او اند څخه اړینه ګټه پورته شوي وي. ښاغلي بابري د خپلو خبرو په پای کې د دې استادانو له کارونو او کړنو څخه ستاینه وکړه او له دوی څخه یې په معنوي ملاتړ تاکید او تعهد وکړ.
وروسته د اقتصاد پوهنځي استادانو هر یو پوهنیار سیف الدین سیحون، پوهاند محمد اشرف یادګاري، پوهنمل عبدالحسیب موحد په خپل وار سره د دې غونډې په معنوي اهمیت او ارزښت، د پوهانو او قلم څښتنانو له لوري د استاد لوړ مقام او د دې استادانو د ارزښت وړ کارونو او رول باندې خبرې وکړې او هغوی یې د صداقت او انسانیت الګو، چې په کابل پوهنتون او اقتصاد پوهنځي کې، چې انسان جوړونکی بنسټ دی له جوړېدو تر اوسه ټولنې ته زیات وړ کسان وړاندې کړي، دي.
وروسته پدې غونډه کې د تېرو کلنو د علمي شورا د غړو عکسونو په خپرولو سره او پدې ناسته کې د حاضرو استادانو د دې عکسونو په اړوند خپلې خاطرې بیان او په پای کې ۱۲ متقاعدو او پخوانیو استادانو، چې له ډلې څخه یې ۹ تنو شتون درلود ستاینلیکونه او وطني چپنې د رهبري او اقتصاد پوهنځي د ادارې له لوري ورکړل شوې.
د کابل پوهنتون اقتصاد پوهنځي په ۱۳۳۶ هـ.ل کال د لسانس په کچه د ۲۰ تنو محصلینو په جذب سره د کابل په جوی شیر کې «د اقتصاد د لوړو زده کړو موسسه» تر عنوان لاندې فعالیت پیل کړ. همدارنګه په ۱۳۵۹ کال کې هم د دې پوهنځي ماسټري فعاله شوه او اوس، چې له جوړېدو څخه ۶۳ کاله تېریږي، په مختلفو ورځې، شپې او ماسټري برخو کې د ۳۱۴۰ تنو په شاوخوا کې محصلین لري او هر کال زیات شمېر محصلین ټولنې ته وړاندې کوي.
دا غونډه د سهار په ۱۰:۳۰ پیل او د غرمې په ۱۲ بجو هیواد او هیوادوالو ته د خیر او ښېګڼې د دعا په کولو سره پای ته ورسېده.
