د ترکیې هېواد د دمپلوپنار پوهنتون علمي مرستیال له کابل پوهنتون څخه لیدنه وکړه

د ترکیې هېواد د دمپلوپنار پوهنتون علمي مرستیال دکتور شاه مراد اریک له کابل پوهنتون څخه د یوې لیدنې په لړ کې د کابل پوهنتون رئیس ښاغلي دکتور اسامه عزیز سره وکتل.

ښاغلي اریک د کابل پوهنتون رئیس سره په لیدلو خوښي څرګنده کړه او د دمپلوپنار پوهنتون جوړښت اوفعالیتونو په هکله یې د کابل پوهنتون رئیس ته معلومات ورکړل او د اقتصاد، عامه ادارې، انجنیري پوهنځیو سره د همکاری او همدارنګه د کابل پوهنتون استادانو ته د ماسټری او دکتورا په کچه د بورسیو پر ورکړې چمتووالی وښود او زیاته یې کړه، چې د دمپلوپنار پوهنتون چمتو دی د کابل پوهنتون سره د زیاتوهمکاریو په موخه، د همکاری هوکړه لیک لاسلیک کړي.

پدې لیدنه کې د کابل پوهنتون رئیس ښاغلي دکتور اسامه عزیز کابل پوهنتون ته د ښاغلي دکتور شاه مراد اریک راتګ ته د ښه راغلاست ترڅنګ له دې پوهنتون سره د هغه همکاري دقیقه او حیاتي وبلله او زیاته یې کړه، چې د دواړو اړخونو ترمنځ د همکاریو د نظر ورته والی شتون لري او مونږ هیله لرو، چې د اصولو او قوانینو په رڼا کې د دواړو لورو ترمنځ یو هوکړه لیک لاسلیک شي ترڅو دا همکاری زیاتې شي.