د «اېپسټینیزم نړیوالې شبکې فعالیتونو ته کتنه» تر سرلیک لاندې علمي سمینار ترسره شو
په دغه سمینار کې د جفري اېپسټین د قضیې اړوند نړیوالې شبکې، فعالیتونه او بشري، اخلاقي او ټولنیز اړخونه وڅېړل شول. ویناوالو د ماشومانو پر وړاندې د جنسي تېري، له هغوی څخه د ناوړه ګټې اخیستنې او د اخلاقي انحراف د بېلابېلو بڼو په اړه خبرې وکړې او دا ډول کړنې یې د اسلامي لارښوونو او اخلاقي اصولو خلاف وبللې.
په سمینار کې د اېپسټین قضیه د لوېدیځو واکمنو او ځواکمنو کړیو د بشري حقونو د شعارونو او عملي کړنو ترمنځ د تناقض د څرګندولو له یوې مهمې بېلګې په توګه مطرح شوه. ویناوالو ټینګار وکړ چې د دغې قضیې په څېر پېښې د لوېدیځو هېوادونو د بشري حقونو د ادعاوو په اړه جدي پوښتنې راپورته کوي، په ځانګړي ډول هغه مهال چې د ځواکمنو اشخاصو او اړوندو شبکو احتمالي رول د بحث موضوع وي.
همدارنګه، د قضیې په تړاو د خپرو شویو اسنادو او مطرح شویو ادعاوو د علمي ارزونې پر اړتیا خبرې وشوې، څو مستند معلومات له ناتایید شویو روایتونو څخه بېل شي.
یاد سیمنار چې د پوهندوی دوکتور احمد جاوید شکیب له لوري وړاندي شو، موخه یې د محصلینو د علمي او فکري پوهاوي لوړول، د اېپسټین د قضیې د بېلابېلو اړخونو څېړل او د لوېدیځو شعارونو او عملي واقعیتونو ترمنځ د واټن په اړه د انتقادي بحث زمینه برابرول و.
