په کابل پوهنتون کې د څېړنې میتود او د شمېرې تحلیل سمینار جوړ شو
د کابل پوهنتون د علمي څېړنو امریت له لوري د دې پوهنتون ۵۰ تنو ځوانو استادانو لپاره د څېړنې میتود او د شمېرو تحلیل تر عنوان لاندې پنځه ورځينۍ علمي سمینار جوړ شو.
د دې سمینار په پرانیسته کې لومړی د پوهنتون مرستیال پوهنمل محمد شفیع شریفي خبرې وکړې او په علمي او اکاډمیکو بنسټونو کې یې د څېړنو او څېړنیزو کارونو په ارزښت رڼا واچوله او تاکید یې وکړ، چې پوهنتون له څېړنې پرته د بې روحه بدن په څېر دی او مونږ باید ښوونه او زده کړه په پوهنتونونو کې د څېړنې له لارې پراخه کړو. پوهاند شریفي د دې سمینار له تنظیموونکو څخه د مننې او ستاینې په لړ کې په پوهنتون کې د دا ډول سمینارونو او ورکشاپونو د جوړولو غوښتنه وکړه.
همدارنګه پدې غونډه کې د کابل پوهنتون د علمي څېړنو امر ښاغلي پوهنمل ولي محمد سالاري د دې سمینار انګېزه او موخه او اهمیت په هکله یې ګډونوالو ته رڼا واچوله او زیاته یې کړه، چې د هرې ستونزې حل څېړنه ده او باید دا کار په پوهنتون کې بنسټیز شي او څېړنیز کارونه تر سره شي.
د پرانیستې برخې د ویناوالو څخه وروسته، پوهنوال ډاکټر اسدالله صمدي د پروګرام په هکله عمومي معلومات ورکړل او د دې سمینار موخې او مقاصد یې په هر اړخیز ډول بیان کړل او پدې توګه په عملي ډول سمینار پیل شو او په پام کې ده تر پنځو ورځو به دوام ومومي او په پای کې به ګډون کوونکو ته تصدیق پاڼې وویشل شي.
