د ديني-اصلاحي درسونو لړۍ پیل شوه
د درسونو دا لړۍ، چې د کابل پوهنتون د دعوت او ارشاد آمريت لخوا پيل شوه، يوه اونۍ دوام کوي او د پوهنځيو محصلين په کې په نوبتي شکل د يو ځانګړي مهالويش سره سم ګډون کوي.
په افتتاحيه غونډه کې د پوهنتون رئیس دوکتور اسامه عزیز محصلين خپلو ديني مسؤوليتونو ته وهڅول او ويې ويل، محصلين بايد د مسلکي زده کړو ترڅنګ په ديني برخه کې هم کافي معلومات ولري، د مستشرقينو يا بې دينه طبقو له شکوکو او شبهاتو متاثره نه شي، دینې مسائل د انټرنټ او نورو غير معتبرو سرچينو پرځای مخامخ له معتبرو علماء کرامو او استادانو زده کړي او د اړتيا پر وخت په جرءات سره پوښتنه وکړي ترڅو ورته قناعت حاصل شي.
وروسته شیخ احسان الله حنفي په ورسپارل شوې موضوع خبرې وکړې او ترڅنګ يې محصلینو ته سپارښتنه وکړه چې د دیني مجالسو له لارې خپله دیني پوهه پیاوړې کړي او د فکري جګړې پر وړاندې داسې وروزل شي چې د دین، کلتور او ارزښتونو دفاع وکړي. نوموړي زیاته کړه چې د فکري جګړې پر وړاندې د ځوانانو سالمه تربیه ډېره مهمه ده، تر څو دوی وکولای شي د خپل دین، کلتور او ملي مصالحو دفاع وکړي او د فکري یرغلونو پر وړاندې خپل اغېزناک نقش ولوبوي.
