په کابل پوهنتون کې د ۱۴۰۲ کال کانکور آزموینې غوره محصلین وستایل شول
د لوړو زده کړو وزارت په کابل پوهنتون کې د غونډې په ترڅ کې د روان کال وږي میاشتې په ۲۱ نېټه د ۱۴۰۲ هـ ش کال کانکور آزموینې غوره محصلین د په ډالۍ او ستاینلیکونو وستایل.
د لوړو زده کړو وزارت سرپرست وزیر، ښاغلي شیخ مولوی ندا محمد ندیم، په یاده غونډه کې د خبرو په لړ کې د کانکور په آزموینه کې د غوره محصلینو د هڅو او کوښښونو ستاینه وکړه او هغه یې الهي لوی نعمت یاد کړ. نوموړي له دوی څخه وغوښتل چې د علم او پوهې په ډګر کې خپلو هڅو او کوښښونو ته دوام و رکړي ترڅو په راتلونکي کې ډیرې بریاوې ترلاسه کړي او په دې برخه کې دلوړو زده کړو وزارت مسؤلین په پوره توان ددوی په خدمت کې دي.
د لوړو زده کړو وزارت محصلانو چارو مرستیال ښاغلي مفتي طاهر احمد په خپلو خبرو کې له ځوانانو و غوښتل ترڅو د تحصیل اصلي موخه ددین او هېواد خدمت وګرځوي.
همدارنګه د پوهنې وزارت مالي او اداري مرستیال ښاغلي مولوي صبغت الله وصیل لسو غوره مقام ګټونکو ځوانانو ته مبارکي ورکړه او د علم په ډګر کې د هغوی ځلېدل وستایل.
بل خوا د مسلکي او تخنیکي ادارې رئیس ښاغلي مولوي غلام حیدر شهامت په یاده غونډه کې د قلم ارزښت او مقام په اړه خبرې وکړې او زیاته یې کړه چې ځوانان د قلم او فکر پوسیله د افغانستان غوره خلک ګڼل شوي چې دا ددوی او کورنۍ لپاره یې د ویاړ او کامیابۍ ځای دی.
د ۱۴۰۲ هـ ش کال کانکور آزموینې عمومي اول نمره محمود د لوړو زده کړو وزارت لخوا د یادې غونډې له جوړولو مننه وکړه او هیله یې څرګنده کړه چې ددوی لپاره له هېواده بهر د تحصیلي بورسونو زمینه برابره کړي. نوموړي له کورنیو وغوښتل چې په خپلو اولادونو باندې زده کړې وکړي ترڅو د هېواد راتلونکي روښانه او ځلانده شي.
