په کابل پوهنتون کې د سپینې امسا (نابینایانو) نړیواله ورځ ولمانځل شوه
د اکتوبر ۱۵مه د سپینې امسا (نابینایانو) ورځ ده. دغه ورځ د کابل پوهنتون رئیس دکتور اسامه عزیز، د ریاست مرستیالانو، د ښار جوړونې وزارت، د کابل ښاروالۍ استازو، ګڼ شمېر محصلینو او نابینا محصلینو په ګډون د پوهنتون په نوي ادیتوریم کې ولمانځل شوه.
د پوهنتون رئیس د خپلو خبرو په ترڅ کې په یاد پروګرام کې د ګډون له امله خوښي څرګنده کړه او ویې ویل چې معلولیت د دوی د پرمختګ مخه نشي نیولای که چېرته دوی هدف او اراده ولري نو کولای شي زده کړه او ټولنې ته خدمت وکړي. هغه یاده کړه چې اوس مهال په کابل پوهنتون کې شاوخوا ۸۰ تنه نابینایان محصلین په بېلا بېلو څانګو کې په زده کړه بوخت دي، چې له دې جملې ۳۰ تنه ښځینه او پاتې نور یې نارینه محصلین دي.
پدې غونډه کې د ښارجوړونې وزارت د پلان او پالیسۍ رئیس رحمت الله قدیري هم خبرې وکړې او معلولین په ځانګړي توګه نابینایانو ډله یې د درناوي وړ وبلل. او زیاته یې کړه، چې نابینایانو د نبي علیه السلام پر وړاندې یو خاص ځای درلود او موږ باید د هغوی په قدر پوه شو.
وروسته په کابل پوهنتون کې د نابینایانو د ملاتړ د ټولنیزې ټولنې مشر سید اشرف بدخش او په پوهنتون کې د برېل مطبعې د تخنیکي برخې مسؤل محمد هادي الهام په خپلو خبرو کې د یادې غونډې د جوړېدو په خاطر د کابل پوهنتون له رهبرۍ څخه مننه وکړه. او ویې ویل چې نابینایان د ټولنې زیار کښ او کارنده برخه ده نو باید د دوی له ظرفیتونو او وړتیاوو څخه کار واخیستل شي او دا یې د نظام د مسؤلینو دنده وبلله.
په غونډه کې د کابل پوهنتون د برېل مطبعې مسؤل حسیب الله ظاهر، د خبرو پر مهال د نابینایانو لپاره د ښوونې او روزنې په برخه کې د مؤسساتو د پاملرنې، د کابل پوهنتون څخه د ماسټري برنامې د برابرولو زمینه او همدارنګه د ښارجوړونې وزارت لخوا د استوګنځي او کور جوړولو غوښتنه وکړه.
یاده غونډه د نابینایانو لخوا په برېل مطبعه کې د عملي کارونو په تر سره کولو سره پای ته ورسېده، چې د پوهنتون د مشرتابه او ګډونوالو د توجه او خوښي وړ وګرځېده. د برېل مطبعې اداره د نابینا محصلینو لپاره د درسي کتابونو او چپترونو د چاپ زمینه برابروي چې د نابینا کسانو په واسطه به د کابل په پوهنتون کې مخ ته وړل کېږي.
