په کابل پوهنتون کې د ادبی دیسکورس پروګرام پیل شو
نوموړی پروګرام په کابل پوهنتون کې د ملي رادیو تلویزون په مرسته د هېواد علمي او ټولنیز مسائلو په اړه د بحث او نظرونو تبادلې په موخه پیل شو.نوموړی پروګرام د ملي راډیو ټلوېزون لخوا په ژوندۍ بڼه خپریږي.
د یاد پروګرام پرانیستې مراسمو کې د اطلاعات او فرهنګ وزارت مرستیالانو، د ملي رادیو ټلوېزون رئیس، د هیواد د ورزش ادارې عمومي رئیس او د کابل پوهنتون رئیس برخه اخیستې وه.
د اطلاعات او فرهنګ وزارت خپرونو مرسیتال ښاغلي مولوي مهاجر فراهي د یاد پروګرام له پیلولو څخه خوښي څرګنده کړه او هغه یې د کابل پوهنتون نوښت وباله او هیله یې وښووده؛ چې یاد پروګرام به دوام ومومي؛ تر څو د پوهنتون استادانو ته په ټولنه کې د مهمو علمي او فرهنګي مسایلو په اړه نظرونو د تبادلې زمینه برابره شي.
د اطلاعاتو او فرهنګ وزارت ځوانانو مرستیال ښاغلي قاري محمدیونس راشد په اسلام کې د ادب اغېز او ارزښت په اړه خبرې وکړې او د یاد پروګرام پیل یې غوره ګام یاد کړ.
همدارنګه ملي راډیو ټلوېزون رئیس ښاغلي قاري یوسف احمدي پخپلو خبرو کې د یاد پروګرام ددوام ډاډ ورکړ او زیاته یې کړه؛ چې ملي رادیو تلوېزون د ملي بنسټ په توګه د استادانو او محصلینو په خدمت کې دی او دهغوی نظریې به تر خلکو رسوي.
د کابل پوهنتون رئیس ښاغلي دوکتور اسامه عزیز هم ملي رادیو تلویزون لخوا د یاد پروګرام پیلولو څخه د خوښۍ ترڅنګ له هغوی څخه مننه وکړه او له محصلینو یې وغوښتل؛ چې په یاد پروګرام کې فعاله ونډه او غوره استفاده وکړي.
د دیسکورس په لومړي پروګرام کې چې په کابل پوهنتون کې ترسره شو؛ د داخلي ژبو او ادبیاتو پوهنځي دوه تنه استادانو هریو: ښاغلي پوهنوال دکتور اجمل ښکلی او ښاغلي پوهنمل محب الله ترابي د پښتو ژبې او ادبیاتو په اړه بحث وکړ او په آخر کې یې د محصلینو او ګډونوالو پوښتنې ځواب کړې.
