د کرنې پوهنځي له لس قلمه څخه زیات تولیدات د مني موسم کرنیزو تولیداتو نندارتون کې نندارې ته وړاندې شول
د کابل پوهنتون کرنې پوهنځي له لسو قلمو څخه زیات تولیدات، چې ددې پوهنځي محصلینو په هڅو چمتو شوي وو د کرنې وزارت کرنیزو تولیداتو ۲۹ نندارتون کې چې د هېواد لوړ رتبه چارواکو او بهرنیو ډیپلوماتانو هم پکې برخه اخیستې وه، نندارې ته وړاندې شول.
له دې نندارتون څخه لیدونکو د کرنې پوهنځي له تولیداتو څخه له نېژدې لیدنه وکړه او د محصلینو نوښتونه او هڅې یې و ستایلې.
د کابل پوهنتون رئیس دوکتور اسامه عزیز او همدارنګه د کرنې پوهنځي رئیس ښاغلي پوهنمل صفي الله جوهر هم له یاد نندارتون څخه لیدنه وکړه.
د کابل پوهنتون رئیس د کرنې پوهنځي تولیداتو له غرفو څخه د کتنې پر مهال د پوهنځي محصلینو هڅونې ترڅنګ ددوی هڅې د اکاډمیک بنسټ د علمي هڅو یوه بیلګه یاده کړه، چې د کرنې په برخه کې د هېواد پر ځان بیسیاینې په موخه هڅه کوي.
همدارنګه ښاغلي اسامه عزیز وویل: د کرنې پوهنځي تولیداتو بیلګې له ښکېلو بنسټونو سره په ځانګړې توګه د نظام لوړ پوړو چارواکو سره شریکوي؛ ترڅو هغوی د هېواد علمي بنسټونو علمي او عملي وړتیاو څخه خبر شي.
د مني موسم کرنیزو تولیداتو ۲۹ام نندارتون چې د کرنې، مالدارۍ او اوبو لګولو وزارت لخوا په بادام باغ کې ترسره شوی، څلور ورځې به دوام وکړي او هره ورځ به له هغه څخه علاقه لرونکي کسان لیدنه وکړي.
