د کابل پوهنتون مالي او اداري مرستیال معرفي شو
د روان کال د کب په ۲۸ نېټه د پنجشنبې په ورځ د لوړو زده کړو وزارت مالي او اداري مرستیال نور احمد درویش، د کابل پوهنتون رییس پوهاند دکتور محمد عثمان بابري په داسې حال کې، چې د دې پوهنتون د علمي چارو مرستیال پوهاند محمد شفیع شریفي، د محصلینو چارو مرستیال پوهندوی فیصل امین او د پوهنځیو رییسانو شتون درلود د کابل پوهنتون مالي او اداري معاونیت سرپرست الله محمد سلیم د دې پوهنتون کارمندانو ته وروپېژاند.
د کابل پوهنتون رییس د دې پوهنتون د مالي او اداري معاونیت سرپرست د معرفي په غونډه کې وویل، چې په دولتي ادارو کې بدلون یو اصل دی او دا کار په ادارو کې د کار او مدیریت د سمون سبب کیږي. دکتور بابري زیاته کړه، چې کابل پوهنتون باید رڼه، متحرکه او ځواب ویوونکې بروکراسي ولري او دا کار يواځې د دې پوهنتون د رهبري د تعهد او هڅو سره د باور وړ ده.
نوموړي تاکید وکړ، چې د کابل پوهنتون نوی سرپرست مالي او اداري مرستیال په زیات جدیت سره هڅه وکړي تر څو د دې پوهنتون د خدمتونو په وړاندې کولو سره مثبت او رضایت کوونکي خدمات وړاندې کړي او یو ريښتینۍ بدلون واوسي. د کابل پوهنتون رییس د دې پوهنتون د پخواني مالي او اداري مرستیال له کړنو څخه د مننې او په کارونو کې یې ورته د بریالیتوب غوښتنه وکړه.
همدارنګه د لوړو زده کړو وزارت مالي او اداري مرستیا نور احمد درویش د کابل پوهنتون د مالي او اداري مرستیال د معرفي پر مهال وویل، چې په کابل پوهنتون کې د د خدماتو وړاندې کولو او کارونو د ښه والي په موخه د لوړو زده کړو وزارت هوډ لري، چې ښاغلي الله محمد سلیم د کابل پوهنتون مالي او اداري مرستیال په توګه وګماري. د لوړو زده کړو وزارت مالي او اداري مرستیال ښاغلي سلیم ته د بریالیتوب هیلې د څرنګندولو تر څنګ له نوموړي څخه وغوښتل، چې زیاته هڅه وکړي، چې د کابل پوهنتون ستونزې او نیمګړتیاوو د له منځه وړو په موخه زیاتې هڅې وکړي.
له بل لوري د کابل پوهنتون نوي سرپرست مالي او اداري مرستیال الله محمد سلیم هم د لوړو زده کړو وزارت له باور څخه مننه وکړه او ویې ویل، چې د خپلې کاري برخې اړوند د غوره خدماتو د تر سره کولو لپاره متعهد دی. همدارنګه نوموړي تاکیدو کړ، چې په کابل پوهنتون کې د ستونزو، نیمګړتیاوو او ناکامیو د له منځه وړو لپاره د دې پوهنتون د رهبري په همکاري بې وقفې هڅه کوي او دا خپل مسوولیت ګڼي.
د یادونې وړ ده، چې د کابل پوهنتون پخوانۍ مالي او اداري مرستیال مسعود پیروزي د ننګرهار پوهنتون د مالي او اداري مرستیال په توګه په دنده ګمارل شوی دی.
