د کابل پوهنتون د محصلینو د فراغت غونډې په دوام دا ځل د انجینرۍ، اقتصاد او ارواپوهنې پوهنځیو محصلینو د فراغتغونډې مراسم تر سره کړل
د روان کال مرغومي میاشتې په لومړۍ نېټه د پنجشنبې په ورځ د اقتصاد، انجینري او ارواپوهنې پوهنځیو محصلینو د یوې غونډې په ترڅ کې په جلا جلا ډول چې د یادو پوهنځیو رئیسانو او استادانو پکې ګډون درلود د فراغتغونډې مراسم تر سره کړل.
د کابل پوهنتون د علمي چارو مرستیال پوهاند محمد شفیع شریفي چې د محصلینو د فراغت په مراسمو کې یې ګډون کړی وو محصلینو ته د فراغت مبارکي ورکړه او له محصلینو څخه یې وغوښتل چې په ژوند کې باید هدف ولري. پوهاند شریفي ټینګار وکړ چې فارغ شوي محصلین باید د خپل تحصیلي دور د تر لاسه شوې پوهې او مهارتونو ته په کتو سره په هېواد کې د کار د لازیاتوالي په برخه کې زمینه برابره کړي.
د فراغت پدې دور کې د اقتصاد پوهنځي څه باندې ۳۰۰ سوه تنه، د انجینري پوهنځي څه باندې ۱۶۰ تنه او د ارواپوهنې له پوهنځي څه باندې ۴۷ تنه محصلین فارغ شول.
د یادونې وړ ده چې تر دې وړاندې د کابل پوهنتون د نورو پوهنځیو محصلینو هم په بېلا بېلو برخو کې د فراغت جشنونه نمانځلي او پدې ترتیب سره به د فراغت د نمانځنې لړۍ په دوو اونیو کې پای ته ورسېږي چې په مجموعي ډول د کابل پوهنتون شاوخوا ۴۲۰۰ محصلینو د فراغت سندونه تر لاسه کړل.
