د کابل پوهنتون د رئيس پیغام

ګرانو دوستانو او باعزته محصلینو

د کابل پوهنتون په استازیتوب د هیواد د مور پوهنتون په توګه، خوښ یم، چې دې پوهنتون ته د زده کړې، څېړنو او اکاډمیکو او اداري فعالیتونو ته نوي زده کوونکي او همکاران دعوتوم.

تر ۱۳۷۵ کال پورې د هیواد لوړو زده کړو نسبتآ ښه وضعیت درلود، ولې په خواشیني سره د تېرو دوه لسیزو څخه ډېر وخت کیږي، چې د افغانستان اسلامي جمهوريت تر راتګ پورې یې ویجاړي وزغملې او په ټولو اړوندو برخو کې یې توانايي کمې شوي. ځینې د دې نیمګړتیاوو څخه د تکړه استادانو له لاسه ورکول او یا هم په وروستیو مرحلو کې د تحصیلي نظام پراختیا لپاره د اړینو او لازمو فرصتونو نشتون وو او تر اوسه احساسیږي.

په وروستیو دوه لسیزو کې د هیواد لوړو زده کړو کې د پام وړ بدلونونه او پرمختیا تر سترګو کیږي. د لوړو زده کړو ملي ستراټیژي جوړېدل، د قانوني چوکات نوي کېدل، د لوړو زده کړو بنسټونو پراختیا، د ښوونیزو بنسټونو پیاوړتیا، په حکومتوالي کې بدلون، اداري پرمختیا او د لوړو زده کړو نظام د علمي کادر ظرفیت لوړول یې د دې برخې د پام وړ او مهم موارد شمېرل کیږي.

کابل پوهنتون د مور پوهنتون او په هیواد کې د لوی اکاډمیک بنست په توګه په تېرو دوه لسیزو کې د پراختیا، لاسرسي، د پوهنځيو جوړېدو، د نویو څانګو او مرکزونو جوړېدو، په ښوونیز نظام کې بدلون، د علمي ظرفیت زیاتوالي او لوړوالي، فزیکي او ښوونیزو بنسټونو پراختیا او پیاوړتیا په برخو کې د بدلونونو او پرمختیا شاهد دی. د دې ټولو سره- سره د لوړو زده کړو څخه نویو غوښتنو او د هیواد ټولنیز او اقتصادي مهمو او د پام وړ اړتیاوو ته په کتو، کابل پوهنتون اړتیا لري تر څو خپل ښوونیز او علمي موقف ته زیاته پاملرنه وکړي.

ګرانو دوستانو!

کابل پوهنتون خوښ دی، چې خپلو علاقمندانو ته یې په ۲۲ پوهنځیو او ۹۶ څانګو کې د لسانس او تر لسانس پورته مناسبې تحصیلي برنامې او د دې تحصیلي برنامو مناسبو موخو ته په پاملرنې او تمرکز سره برابري کړي دي.

ډاډه یم، چې معینو ننګونو په شتون کې، دا پوهنتون د هیوا په کچه د ښوونیزو غوره امکاناتو او اسانتیاوو درلودونکی دی. د دې ترڅنګ دې علمي بنسټ د هیواد په زړه کې یوه پراخه او زړه راښکونکې فضا- دې پوهنتون ځانته منحصره کړې ده.

مونږ په بدلون، ډسپلین، د ملي او اکاډمیکو ارزښتنو او د دې ترڅنګ مونږ موخیزه خدمتونو ته معتقد یو او هغو ته د رسېدو لپاره کوښښ کوو. پدې توګه له هغو ټولو کسانو څخه، چې دا پوهنتون یې د زده کړې او یا کار لپاره غوره کوي، په ډېر درنښت غوښتنه کوو تر څو د دې بنسټ اصول په پام کې ونیسي، له امکاناتو او فرصتونو څخه یې زیاته ګټه پورته او له مونږ سره زمونږ ګډو موخو ته د رسېدو لپاره همکاري وکړي.

کابل پوهنتون په تېرو دوو لسیزو کې د پام وړ بهرنیو محصلینو درلودونکی وو. دا پوهنتون د نړۍوالو شریکانو او همکارانو په درلودو او له یو لوري د نړۍ وال باور ترلاسه کولو په موخه د نورو هیوادونو محصلینو په درلودو او بهرنیو متخصصانو په جذب او د نړۍوالو معتبره پوهنتونونو سره همکاري او مشارکت ته متعهد دی.

مونږه هیله لرو تر څو زمونږ د فارغینو علمي خدمتونه او څېړنې تر نورو زیات د افغانستان اونړۍ د پرمختګ لپاره غوره او ګټور واوسي. له دې اړخه د کابل پوهنتون کړنو محصول باید تر نورو متفاوت واوسي.

زه له تاسو استقبال کوم تر څو پدې ځای کې د خپل پرمختګ او ویاړ لپاره زده کړې کوی، خپله، د کورنۍ او ټولنې راتلونکی بدلوی او یا له مونږ سره پدې سپارل شوي دنده کې په خوښي کار او همکاري کوئ.

درنښت
پوهاند دکتور محمد عثمان بابري

د کابل پوهنتون رییس