د کابل پوهنتون د تضمین کیفیت امریت سرپرست معرفي شو
پوهنیار استاد سید سخي احمد سلطاني د روان کال د غبرګولي په ۲۹ نېټه د سې شنبې په ورځ د کابل پوهنتون د علمي چارو مرستیال پوهاند محمد شفیع شریفي له لوري په داسې حال کې، چې د یو شمېر پوهنځیو رییسانو او یو شمېر استادانو هم ګډون درلود د کابل پوهنتون د کیفیت تضمین امریت د سرپرست په توګه معرفي کړ.
د کابل پوهنتون د علمي چارو مرستیال د پوهنیار سلطاني په معرفي غونډه کې د پوهنتون د کیفیت تضمین کمېټې له پخوانۍ امرې پوهندوی استاد لیلا نادر له کارونو او خدمتونو څخه ستاینه وکړه او ښاغلي سلطاني ته یې په نوې دنده کې د بریالیتوب هیله وکړه. پوهاند شریفي زیاته کړه، چې د لوړو زده کړو په بنسټ کې د کیفیت تضمین له مهمو او اساسي برخې څخه څخه دی او هر څومره، چې دا برخه ځواکمنه وي په هماغې اندازې د لوړو زده کړو خدمتونه باکیفیته او اغېزمن وي. د کابل پوهنتون د علمي مرستیال په وینا وخت راتلونکې، بدلون په لوري درومي او مونږ باید ځانونه له هغه سره همغږي کړو او دا یواځې د کیفیت تضمین له لارې ممکن او تر لاسه کیږي. همدارنګه پوهاند شریفي زیاته کړه، چې په کابل پوهنتون کې د کیفیت تضمین په برخه کې هڅې شوي دي او د هغې پایلې مثبتې دي او مونږ هیله لرو، د استادا سلطاني په هڅو او زحمتونو، چې تازه پدې دنده ګمارل شوی دی پدې برخه کې د زیاتو مثبتو بدلونونو شاهدان واوسو.
پدې برنامه کې پوهنیار استاد سید سخي احمد سلطاني د کیفیت تضمین امریت نوي سرپرست په توګه په معرفي او د کابل پوهنتون رهبري له باور څخه د مننې ترڅنګ یې د کابل پوهنتون کیفیت تضمین د چارو په ښه والي یې تاکید وکړ. ښاغلي سلطاني زیاته کړه، چې د کابل پوهنتون د رهبري په همکاري، د پوهنځیو رییسانو، د څانګو امرینو او همدارنګه استادانو سره ګام په ګام به مخکې ځي او په کابل پوهنتون کې د کیفیت تضمین د غوره والي په برخه کې به هېڅ ډول هڅې ونه سپموي. پوهنیار سید سخي احمد سلطاني د کابل پوهنتون استاد دی او تر ماسټري پورې زده کړې لري.
