د وترنرۍ علومو ډاکټرانو د کلینکي او علمي مهارتونو د لوړاوي علمي کنفرانس ترسره شو
د کابل پوهنتون د وترنرۍ علومو پوهنځي له لوري د کابل او څو ولایتونو د وترنرۍ علومو ډاکټرانو لپاره د «کلینکي او علمي مهارتونو لوړول» تر عنوان لاندې یو ورځنی علمي کنفرانس ترسره شو، چې په کې د وترنرۍ علومو ډاکترانو او د وترنرۍ پوهنځي استادانو ګډون درلود.
په دې کنفرانس کې د وترنرۍ خدماتو د وړاندې کولو پر مهال د کلینکي مهارتونو پر ارزښت، د علمي او ملي کنفرانسونو پر رول، او د وترنرۍ خدماتو د کیفیت د ښه والي پر مهمو موضوعاتو بحثونه وشول.
همدارنګه د ناروغیو د تشخیص، لابراتواري معایناتو، د انټيبیوټیکونو د سم استعمال، د باکتریايي ناروغیو د مخنیوي، او له حیواناتو څخه انسان ته د ناروغیو د انتقال (Zoonotic diseases) په اړه علمي او مسلکي نظریات شریک شول.
