د فوق لېسانس برنامو د ارزونې غونډه ترسره شوه
ددې غونډې موخه د فوق لېسانس برنامو د معیاري کېدو او د یادو برنامو د ظرفیت او کیفیت لوړول یاد شوي دي. په دې غونډه کې د کابل پوهنتون رهبري، د ماسټري بورد غړو، د پوهنځیو رئیسانو، د پوهنځیو ماسترۍ کمېټو غړو او تدریسي مدیرانو پکې برخه اخیستې وه.
د کابل پوهنتون فوق لېسانس برنامو آمر ښاغلي دکتور محمدعلي رضایي د راتلونکي کال لپاره دمحصلانو جذبولو نېټه او همدارنګه په دې غونډه کې د پرزنتیشن په وړاندې کولو سره د فوق لېسانس برنامو د ارزونې چک لېست توضح او تشریح کړ چې د ګډونوالو د پام وړ و ګرځېد.
د کابل پوهنتون رئیس دکتور اسامه عزیز د علمي معاوینت او فوق لېسانس برنامو آمریت له هڅو د مننې ترڅنګ د کیفیت او ظرفیت په برخه کې د برنامو په غوره والي ټینګار وکړ، چې نوموړې برنامه باید په نړیوالو معیارونو برابرې شي.
د پوهنتون علمي چارو مرستیال محمد اشرف غیرت په دې غونډه کې د فوق لېسانس ټیم د همغږۍ او راتونکو موخو او پروګرامونو په اړه خبرې وکړې.
