د فارمسي پوهنځي رهبرۍ د ممیزو، مېوو، سبزیجاتو او طبي بوټو د صادراتو پراختیا ملي ادارې سره دمرستې هوکړه لیک لاسلیک کړ
د کابل پوهنتون فارمسي پوهنځي د روان کال غبرګولي میاشتې ۸مه نېټه د دوشنبې په ورځ د ممیزو، مېوو، سبزیجاتو او طبي بوټو د صادراتو پراختیا ملي ادارې سره د مرستې هوکړه لیک لاسلیک کړ.
د کابل پوهنتون رئیس ښاغلي دکتور اسامه عزیز د هوکړه لیک د لاسلیک په غونډه کې د فارمسي پوهنځي له رهبرۍ څخه د مننې ترڅنګ د یاد هوکړه لیک د ګټې اخیستنې په مثبتو او منفي اړخونو باندې خبرې وکړې؛ هغه یې د دواړو ادارو لپاره ګټور یاد کړ او د هغه په عملي کولو یې ټینګار وکړ.
د ممیزو، میوو، سبزیجاتو او طبي بوټو د صادراتو پراختیا ملي ادارې مشر ښاغلي سید عظیم مصطفی هاشمي یاد هوکړه لیک ارزښتمند یاد کړ او د هغه له عملي کولو څخه یې ډاډ ورکړ.
د فارمسي پوهنځي رئیس ښاغلي پوهنوال آقامحمد ژکفر وایي؛ ددې هوکړه لیک دلاسلیک موخه د ممیزو، میوو، سبزیجاتو او طبي بوټو د صادراتو پراختیا ملي ادارې د فني پرسونل د ظرفیت لوړېدل، د ګډو علمي څیړنو ترسره کېدل، د ګډو علمي سیمنارونو او کنفرانسونو په لاره اچول، د ادارې په مسلکي بستونو کې د پوهنځي څخه په شرایطو برابر فارغو محصلینو ګمارنه بلل شوې ده.
ښاغلي ژکفر زیاته کړه؛ د هوکړه لیک مهم اصل د هغه عملي کول دي؛ چې د فارمسي پوهنخی په دې برخه کې پوره ژمنتیا لري.
د یادونې وړ ده؛ چې د ا.ا.ا له راتګ وروسته د کابل پوهنتون فارمسي پوهنځی د اکادمیکو او مسلکي بنسټونو سره زیات هوکړه لیکونه لاسلیک کړي دي، چې ډیری یې په عملي بڼه پلي کړي هم دي
