د بیزو چیچک ناروغۍ د مخنیوي په اړه د عامه پوهاوي سمینار وړاندې شو
د کابل پوهنتون د وترنري علومو پوهنځي له لوري د بیزو چیچک ناروغي په اړه، چې د انسانانو او څارویو د روغتیا په برخه کې په یوې نړیوالې اندېښنې بدله شوې، د عامه پوهاوي علمي سمینار وړاندې شو.
په دې سمینار کې د یادې ساري ناروغۍ د ډولونو، نښو نښانو، درملنې او مخنیوي اړوند محصلینو او استادانو ته معلومات ورکړل شول، وویل شول دا یوه ساري او ویروسي ناروغي ده چې د کوچنیو حیواناتو لکه بیزو، موږک، سوی او ورته نورو څخه انسانانو ته انتقالېږي.
یاد سمینار کې ټینګار وشو چې د عامې روغتیا وزارت او نور روغتیایي بنسټونه باید په افغانستان کې د دې ویروسي ناروغۍ د مثبتې پېښې تر ثبت وړاندې خپل طبي خدمات زیات کړي او هغه هېوادوال یا بهرنیان چې افغانستان ته راځي باید له معایناتو وروسته هېواد ته د داخلېدو اجازه ورکړل شي، ځکه راپورونه وایي چې د افغانستان په ګاونډیو هېوادونو کې هم د یادې ناروغۍ مثبتې پېښې ثبت شوي دي.
د سمینار په دوام کې د وترنري علومو پوهنځي رئیس ډاکټر شیرعلي جوهر ساپي وویل، له دې سمینار څخه یې موخه عامه پوهاوی او د یادې ساري ناروغۍ اړوند د محصلینو د معلوماتو زیاتوالی دی.په پای کې د کابل پوهنتون مسلکي ظرفیت لوړونې آمر دوکتور اسدالله صمدي د موضوع اړوند پرزنټېشن وړاندې کړ او د ګډونوالو پوښتنو ته یې په وار سره ځوابونه ورکړل.
