"د افغانستان د ځانبسیاینې د زرغون انقلاب لومړی نړیوال کنفرانس" پای ته ورسېده
یاد کنفرانس چې د کابل پوهنتون له لوري د روان لمريز کال د قوس پر پنځمه په کندهار کې پيل شوی و، نن د يادې مياشتې پر اوومه د داخلي او بهرنیو استادانو لخوا د ٨٤ علمي مقالو په ارائیه کولو سره د ا.ا.ا لوړپوړو چارواکو په حضور کې پای ته ورسيد.
د کابل پوهنتون د علمي څېړنو مرستیال دکتور حامد سالاري د کنفرانس پايلې د یو لړ تطبیقي سپارښتنو ترڅنګ ګډونوالو سره شريکې کړې.
د بهرنیو استادانو په استازیتوب د نايجيريا هيواد ډاکټر عبدالرحمن ابوبکر صالحو له کابل پوهنتون څخه مننه وکړه، چې دا مهم کنفرانس یې پر لاره اچولی. نوموړي وویل دا شان کنفرانسونه کولی شي، چې د افغانستان په کرنیز سکټور کې د نوې ټکنالوژۍ کارونې په اساس مثبت بدلونونه رامنځته کړي، هغه د خپلو خبرو په جریان کې وویل نړیواله ټولنه دې له افغانستان سره د زراعتي ټکنالوژۍ په برخه کې لازمې مرستې وکړې ترڅو دلته شته ستونزې حل ومومي.
همدارنګه ټول هغه کورني او بهرني استادان او څيړونکي د منندړې او ګډونپاڼې په ورکولو سره وستایل شول، کومو چې د کنفرانس په بهیر کې علمي مقالې وړاندې کړې وې.
په پای کې د کابل پوهنتون رئیس ښاغلي دکتور اسامه عزیز له ټولو ګډونوالو مننه وکړه، او څرګنده يې کړه چې د کنفرانس پايلې به د تطبیق لپاره د يوې طرحې په بڼه له نظام سره شريکې شي او دا لړۍ به تر هغه دوام ولري ترڅو په هيواد کې زرغون انقلاب پلی شي.
