په کابل پوهنتون کې د کانګو تبې ناروغۍ ګواښونو او دهغه پر وړاندې د مبارزې په اړه علمي کنفرانس ترسره شو
د کابل پوهنتون وترنري علومو پوهنځي د خپلو ملي او مسلکي مسؤلیتونو له مخې د روان کال غبرګولي میاشتې په ۲۴ نېټه چهارشنبې په ورځ د د زونوز ناروغۍ په ځانګړي توګه کانګو تبې ګواښونو او دهغه پر وړاندې د مبارزې په اړه علمي کنفرانس ترسره شو؛ ددې کنفرانس موخه د د زونوز ناروغیو او دهغه د خپرېدو په اړه ټولنې ته د عامه پوهاوي کچه لوړېدل بلل شوې ده.
په نوموړي کنفرانس کې ۴۴ تنه د کابل ښار دولتي مکاتبو مدیرانو، ۲۲ تنه د ناحیو آمرینو، ۲۲تنه د کابل ښاروالۍ قریو استازو، ۷۰ تنو قصاب او پوست پلورونکو، د غواوو، لبنیاتو اتحادیو، عامه روغتیا، کرنې او مالدارۍ، حج او اوقاف، لوړو زده کړو، پوهنې وزارتونو، د کرنې او خوړو نړیوال سازمان، د روغتیا نړیوال سازمان، د کابل ابوعلي سینا پوهنتون مسؤلین، د غږیزو او تصویري رسنیو مسؤلین رابلل شوي وو.
د کابل پوهنتون رئیس ښاغلی دکتور اسامه عزیز په نوموړي کنفرانس کې وویل:
(( پوهنتونونه د محصلینو د روزنې ترڅنګ د ټولنې د ستونزو پیداکول، شننه او د هغه لپاره د حل لاره لټولو دنده هم لري؛ چې نوموړی کنفرانس یې یوه ښه نمونه یادولی شو.))
د کرنې او مالدارۍ وزارت مرستیال ښاغلی مولوي صدراعظم عثماني د نوموړي کنفرانس د ګټو ترڅنګ له شاملو بنسټونو څخه وغوښتل؛ ترڅو په دې برخه کې ډیرې هڅې وکړي.
د عامې روغتیا زونوز ملي کمېټې مسؤل ښاغلي داکټر فخر الدین ستانکزي په نوموړي کنفرانس کې له خلکو وغوښتل چې د کانګو تبې ناروغۍ په اړه د عامې روغتیا وزارت صحي سپارښتنو ته جدي پاملرنه وکړي.
په نوموړي کنفرانس کې د وترنري علومو پوهنځي استادانو پوهاند دکتور نورمحمد ایوبي او پوهنوال داکتر اسدالله صمدي ګډونوالو ته د زونوز ناروغۍ په ځانګړي توګه د کانګو تبې او لیوني سپي پر ناروغیو د هغه د انتقال لارو، کنترول او مخنیوي په اړه چمتو کړي پریزنتیشنونه وړاندې کړل.
د کنفرانس په دوهمه برخه کې علمي هیئت غړو د کانګو تبې ناروغیو تر بحث وروسته د ګډونوالو پوښتنې هم ځواب کړې.
