په کابل پوهنتون کې د قرانکریم د نزول په مناسبت د قران عظیم شان د ختم مراسم تر سره شول
د قرآن عظیم الشان د ختم مراسم د کابل پوهنتون د شرعیاتو پوهنځي د رهبري له لوري د مسلمانانو د دغه سپېڅلي کتاب د نزول په مناسبت د هیواد د لوړو زده کړو وزیر ښاغلي شیخ عبدالباقي حقاني، د دې وزارت مرستیالانو، د کابل پوهنتون رییس دکتور اسامه عزیز او د ریاست مرستیالانو، د پوهنځیو رییسانو، د کابل پوهنتون یو شمېر استادانو، کارمندانو او محصلینو په ګډون د پوهنتون په جامع جومات کې جوړ شول.
په دغو مراسمو کې د هیواد د لوړو زده کړو وزیر ښاغلي شیخ عبدالباقي حقاني د دې برنامې له جوړوونکو څخه یې د مننې ترڅنګ یې د قرآن کریم د فضایلو او د هغه د نزول په اړه یې خبرې وکړې، چې په قران کریم کې زیات فضایل پراته دي او قران کریم یو روزنیز کتاب دی او د انسان د مزاج او فطرت او ژوند اړوند کلي او جزيي اصول پکې شتون لري او په ټوله کې قران کریم یو اعجاز امیزه کتاب او یوه معجزه ده، چې د بشر د لارښوونې په خاطر استول شوی دی.
د کابل پوهنتون رییس دکتور اسامه عزیر هم پدې مراسمو کې خبرې وکړې او په پیل کې یې د دې برنامې ګډوالو ته ښه راغلاست او همدارنګه یې د شرعیاتو پوهنځي څخه يې د روژې مبارکې میاشتې کې د قرانکریم نزول د نیک سنت د نمانځې په موخه یې مننه وکړه او دا یې د ثواب او فیض د تر لاسه کولو ښه فرصت یاد کړ.
دکتور عزیز وویل: قرانکریم د بندګانو لپاره نصیحت دی، د کفر، الحاد، نفاق او کینې، حسد او عناد څخه شفا ورکوونکی او د انسانانو لپاره د دنیا او اخرت لارښود او د مومنانو لپاره رحمت دی او مونږ ته د دې الله ج پدې کتاب د عمل توفیق راکړي.
د کابل پوهنتون رئیس همدارنګه زیاته کړه، د قرآن کریم احکام په هغه وخت کې په بشپړه توګه د تطبیق وړ دي، چې اسلامي حکومت او نظام شتون ولري او الحمد الله اوسنی نظام اسلامي اصولو او شریعت ته ژمن دی او له لوی خدای (ج) څخه غواړو، چې دغه نظام ته توفیق ورکړي ترڅو په ټولنیز، سیاسي، اقتصادي او د ژوند په ټولو برخو کې قراني احکام په بشپړ ډول پلي کړي.
په دې غونډه کې د لوړو زده کړو وزارت علمي مرستیال ښاغلي لطف الله خیرخواه د قرآن کریم د نزول په اړه خبرې وکړې او زیاته یې کړه، چې د قرآن کریم د اعجاز او فضایلو په اړه خبرې زیاتې دي او مونږ باید هڅه وکړو، چې د اسلام د لومړیو په څېر د قران کریم له لارښوونو څخه ګټه پورته کړو او هغه په خپل ژوند کې پلي کړو. د لوړو زده کړو وزارت علمي مرستیال زياته کړه، د قران کريم له آيتونو څخه څرګندېږي، چې دا کتاب د بشر په لاس ند ی لیکل شوی بلکې د الله تعالی له لوري راستول شوی دی.
د یادونې وړ ده، چې پدې غونډه کې د شرعیاتو پوهنځي او ځینو نورو استادانو هم په خپل وار سره د قران کریم د نزول د فضایلو او اعجاز په هکله خبرې وکړې.
