په کابل پوهنتون کې د امریکایي اشغالګرو ځواکونو دوتلو ورځ ولمانځل شوه
ددې غونډې په ترڅ کې دکابل پوهنتون استادانو، ګڼ شمېر زده کړیالانو، د ا. ا. ا استازو له هېواد څخه د امریکایي اشغالګرو د وتلو او د اشغال د پای ورځ ولمانځله.
پدې غونډه کې د لوړو زده کړو وزارت علمي مرستیال لطف الله خیرخواه دغه ورځ د افغانانو لپاره د ویاړ او خوښۍ ورځ وبلله او ویې ویل چې دا بریا په حقیقت کې د ټولو مسلمانانو بریا ده ، مونږ باید داسلامي نظام دساتلو او بقا لپاره هر اړخیزه هڅې وکړو او د مسلمانانو لپاره یې دنمونې نظام وګرځوو ، دا د هېواد د ځوان نسل مسوولیت دی تر څو پدغه لاره کې پیاوړی ګامونه پورته کړی.
همداراز پدغه غونډه کې د ملي دفاع وزارت د هوایی ځواکونو مشرتابه ښاغلي مولوي امان الدین منصور د امریکا پر وړاندې د شل کلن جهاد یادونه وکړه او دا یې د افغانانو لپاره ویاړ او کامیابی وبلله ، ټینګار یې وکړ چې دا آزادي څه په آسانه نده ترلاسه شوې ، مونږ باید د هغه په قدر پوه شو او د هېواد ځوان نسل باید د اسلامي نظام د ساتلو او بقا لپاره وهڅوو.
پدغه غونډه کې استادانو او نورو مېلمنو هم د امریکایی اشغال د ماتې او بهرنیو ځواکونو د وتلو په اړه خبرې وکړې او د امریکا پر وړاندې یې د افغانانو شل کلن جهاد د هېواد په تاریخ کې یو زرین او نه هېرېدونکی ټکی وباله.
