د کابل پوهنتون محصلینو ته د فریلانسنګ زده کړو کورس پیل شو
نوموړی کورس د اطلاعات او فرهنګ وزارت ځوانانو معینیت لخوا د کابل پوهنتون محصلینو ته د عوایدو او دندې پیداکولو په موخه پیل شوی دی.
په یاد کورس کې د ګډون آزموینه د کابل پوهنتون محصلینو په شتون کې د ۱۴۰۲ هـ ل کال وري میاشتې په ۶نېټه واخیستل شوه، ددې کورس زده کړې به یوه میاشت دوام وکړي.
د اطلاعات او فرهنګ وزارت ځوانانو چارو مرستیال ښاغلی قاري محمد یونس راشد په کابل پوهنتون کې ددې برنامې د پیل په مراسمو کې وویل: (د هېواد ځوانان له وزګارتیا زیات ځوریږي، موږ هڅه کوو، ترڅو د کار له بیلابیلو لارو څخه د هېواد ځوانانو ته د دندې او عوایدو پیداکولو په موخه آنلاین کار زمینه برابره کړو).
د کابل پوهنتون رئیس ښاغلي دکتور اسامه عزیز د اطلاعات او فرهنګ وزارت نوموړې برنامه د محصلینو د ظرفیت لوړونې لپاره ګټوره او اغېزمنه وبلله او له محصلینو یې وغوښتل چې پخپل وخت زده کړو ته حاضر شي ترڅو مثبته پایله ترلاسه کړي. همدارنګه نوموړي زیاته یې کړه؛ په پام کې لري، په نیژدې راتلونکي کې د لازیاتو همکاریو په موخه د کابل پوهنتون او اطلاعات او فرهنګ وزارت ځوانانو معینیت ترمنځ هوکړه لیک لاسلیک کړي.
له دې سره سره په پام کې ده، د فریلانسنګ زده کړو کورس د هېواد نورو ولایاتو ځوانانو لپاره هم دایر شي.
