د کابل پوهنتون علمي شورا غونډه ترسره شوه
نوموړې غونډه د روان کال سلواغې میاشتې په ۲۴مه نېټه د سه شنبې په ورځ د کابل پوهنتون رئیس او مرستیالانو په شتون کې ترسره شوه.
د پوهنتون رئیس ښاغلي دکتور اسامه عزیز د پوهنتون علمي لاسته راوړنو او مهمو مسایلو په اړه لکه: په بریالیتوب سره د تضمین کیفیت ارزونې پروسې پای ته رسېدل، د فوق لېسانس برنامو، استادانو چارو انسجام او د استادانو مسلکي پراختیا آمریتونو مثبتو کړنو او نورو برخو باندې خبرې وکړې او د هغوی کړنې یې وستایلې.
د اجنډا سره سم د استادانو د احصایې په شمول (۴۸) تحصیلي او علمي قضیو، د ۱۴۰۳.ل کال لپاره د پوهنتون تطبیقاتي او عملیاتي پلان چمتو کولو، د ستراتیژیک پلان لپاره د ۵ کلن مالي پلان چمتو کولو، د وترنري پوهنځي علومو او لبنیاتو ټکنالوژۍ ماسټرۍ برنامې تاییدول، په کمپیوتر ساینس پوهنځي کې د معلوماتي سیسټم څانګې د شپې برنامې رامنځ ته کول، د تضمین کیفیت اسنادو آنلاین کول، د کمېټو د تشکیل بشپړېدل، د معاونیتونو او اصلي کمېټو د تطبیقي پلان راپورونو او نورو مهمو موضوعاتو باندې بحثونه وشول او د هر یو په اړه د قوانینو، مقرراتو او لایحو په اړه لازمې پرېکړې ترسره شوې.
