د کابل پوهنتون رییس د کابل پوهنتون د معلوماتي او مخابراتي ټکنالوژي پوهنځي د اکاډمیک او اداري وضعیت پر ښه والي تاکید وکړ
د کابل پوهنتون رییس د معلوماتي او مخابراتي ټکنالوژي پوهنځي له سرپرست مسوولینو او استادانو سره په لیدنه کې په داسې حال کې، چې د کابل پوهنتون د علمي چارو مرستیال پوهاند محمد شفیع شریفي او د محصلینو چارو مرستیال هم شتون درلود، د دې پوهنځي د درسي وضعیت او اداري کارونو په ښه والي تاکید وکړ. پدې لیدنه کې، چې د روان کال د وري په ۷ نېټه د شنبې په ورځ ترسره شوه، د کابل پوهنتون رهبري د معلوماتي او مخابراتي ټکنالوژي پوهنځي د چټکو، رڼو او روښانه اقداماتو غوښتونکی شو.
د کابل پوهنتون رییس پوهاند دکتور محمد عثمان بابري وویل: په کابل پوهنتون کې د شته معیارونو پر بنسټ د معلومات او مخابراتي ټکنالوژي پوهنځي درسي وضعیت او کاري بهیر د منلو وړ ندی او د دې پوهنځي د محصلینو شکایتونو ته په کتو پدې پوهنځي کې زیاتې ستونزې او نیمګړتیا شتون لري، دا ستونزې او نیمګړتیاوې باید ژر تر ژره په جدي توګه حل او ختمې شي. دکتور بابري زیاته کړه، چې د کابل پوهنتون د بدلون پلان ته په کتو د راپور ورکوونې، کاري پلان تهیه او ترتیب کړي او همدارنګه د معلوماتي او مخابراتي ټکنالوژي د ډیپارټمنټونو ناستې په سم ډول او په ټاکلي وخت تر سره تر څو پدې پوهنځي کې کاري خلاوې له منځه لاړې شي. د کابل پوهنتون رییس د معلوماتي او مخابراتي ټکنالوژي مسوولینو ته وعده ورکړه، چې دی د هغو ترڅنګ دی او هر وخت، چې اړتیا پېښه شي له دوی سره په هره برخه کې د ستونزو په حل کې ملاتړ کوي. وروسته د معلوماتي او مخابراتي ټکنالوژي مسوولینو د کابل پوهنتون رییس له لارښوونو څخه مننه وکړه او وعده یې وکړه، چې د پوهنتون د رهبري هئیت د لارښوونو په رڼا کې د یاد پوهنځي د ستونزو د حل په موخه به په ټول توان سره کار کوي.
د معلوماتي او مخابراتي ټکنالوژي پوهنځي سرپرست پوهنیار احمد نجیم نورزاد وویل، چې د دې پوهنځي د درسي او اداري وضعیت په ښه والي کې یې یوه اندازه کړنې تر سره کړي دي، ولې بسنه نکوي او دوی باید د کارونو د ښه والي په برخه کې تر پخوا زیات کار وکړي تر څو پدې پوهنځي کې وضعیت معیاري او د منلو وړ شي. په پای کې د معلوماتي ټکنالوژي پوهنځي سرپرست تاکید وکړ، چې د دې پوهنځي رهبري کاري تعهد لري او دا د قانون او د افغانستان د اسلامي دولت پر وړاندې او همدارنګه د هیواد د سبا نسل د ښوونې او روزنې پر وړاندې خپل مسوولیت ګڼي.
د معلوماتي او مخابراتي ټکنالوژي پوهنځي تر دې وړاندې د مخابراتو او معلوماتي ټکنالوژي وزارت تر مدیریت لاندې خپل فعالیت تر سره کاوه، ولې تېر کال د لوړو زده کړو وزارت او د مخابراتو او معلوماتي ټکنالوژي وزارت د هوکړې او د جمهوري ریاست د عالي مقام د حکم پر بنسټ دا انسټیټوټ کابل پوهنتون ته ورکړل شو او د معلوماتي او مخابراتي ټکنالوژي پوهنځي ته یې ارتقا وکړه.
