د کابل پوهنتون رئيس چين ته سفر وکړ
د ١٤٠٢ لمریز کال د ليندۍ د مياشتې په ١٨مه نيټه د کابل پوهنتون رئيس ښاغلي دکتور اسامه عزيز د چين تايووان تکنالوژي پوهنتون په رسمي بلنه د چينايي ژبې نړيوال درې ورځني کنفرانس کې د ګډون په موخه د چين بيجينګ ښار ته سفر وکړ، چې د بهرنيو ژبو او ادبیاتو پوهنځي رئيس ښاغلي پوهاند دکتور ګل محمد باسل او د چينايي ډيپارټمنټ آمر ښاغلي حميد غلامي يې هم ملتیا کوله.
په ياد کنفرانس کې د نورو ګډونوالو ترڅنګ د نړۍ د پنځوسو پوهنتونونو استازو برخه اخيستې وه.
د پوهنتون رئيس په ياد کنفرانس کې د ګډون تر څنګ د چين ټايووان ټکنالوژي پوهنتون له محترم رئيس سره د هغه په دفتر کې وکتل. په دې ملاقات کې دواړو اړخونو په ګډې همکارۍ باندې تاکيد وکړ او موافقه وشوه چې د کابل پوهنتون او تايووان تکنالوژي پوهنتون ترمينځ د ګډې همکارۍ ساحه به د ژبو او ادبیاتو ترڅنګ، د طبيعي علومو او تکنالوژۍ ساحو ته هم وغځيږي. په دې ملاقات کې د کابل پوهنتون رئيس له تايووان پوهنتون څخه مننه وکړه چې افغان محصلينو ته يې په خپل پوهنتون کې د تحصيل زمينه برابره کړې ده.
د کابل پوهنتون رئيس په تايووان پوهنتون کې افغان محصلينو سره هم وکتل، د هغوی حال يې واخيست او د هغوی غوښتنې يې د اړوند پوهنتون له رئيس سره شريکې کړې.
د يادونې وړ ده د چين تايووان پوهنتون او کابل پوهنتون د ګډې همکارۍ تفاهمليک لاسليک کړی او په نږدې راتلونکې کې به د دې همکارۍ ساحه لاپراخه شي.
