د کابل پوهنتون د خارجي ژبو او ادبیاتو پوهنځي د فرانسوي څانګې پارک پرانیستل شو
د کابل پوهنتون د بهرنیو ژبو او ادبیاتو د فرانسوي ژبې څانګې پارک د کابل پوهنتون رییس پوهاند دکتور محمد عثمان بابري په داسې حال کې، چې د دې څانګې استادانو او محصلینو هم شتون درلود، د روان کال د غوايي په ۱۴ نېټه پرانستل او ګټې اخیستنې ته وسپارل شو.
د کابل پوهنتون رییس د دې پارک د پرانیستې په مراسمو کې د بهرنیو ژبو او ادبیاتو پوهنځي د فرانسوي څانګې آمرې له هڅو او زحمتونو او د دې څانګې استادانو او محصلینو، چې د دې پارک په جوړېدو کې یې اصلي زیار ګاللی دی مننه وکړه او ویې ویل، چې ستاسو دا کار د نورو پوهنځیو او څانګو لپاره یوه الګو او لارښود دی، چې داسې نوښت له ځانه وښيي. پوهاند بابري په پوهنتونونو کې پاکوالی او نظافت او همدارنګه نظم او انضباط یې جدي او اړتیا یاده کړه، چې دا کار د استادانو او محصلینو په همکاري او هڅو تر لاسه کیږي. دکتور بابري وعده وکړه، چې د نوښت او پراختیا په برخه او همدارنګه په پوهنتون کې د پاکو او زرغونو ځایونو جوړولو په برخه کې به هېڅ ډول هڅې ونسپموي.
د یادونې وړ ده، چې د کابل پوهنتون د بهرنیو ژبو او ادبیاتو پوهنځي د فرانسوي څانګې پارک د فرانسوي څانګې آمرې دکتورې مستورې عظیمي په شخصي لګښت، د کابل پوهنتون د خدماتي برخې په همکاري او د دې پوهنتون د انجنیري پوهنځي د محصلینو په مهنډسي سره جوړ شو.
