د کابل پوهنتون تر سلو زیاتو محصلینو د څېړنې مېتود او د کاري وړتیاوو روزنیز پروګرام کې زده کړه وکړه
د کابل پوهنتون د بېلابېلو پوهنځیو څه د پاسه ۷۰ تنه ښځینه او ۳۰ تنه نارینه محصلینو د څېړنې مېتود او د کاري وړتیاوو روزنیز پروګرام، چې د محصلینو د خدمتونو د انسجام آمریت له لوري جوړ شوی وو، زده کړه وکړه.
دغو محصلینو ته د پوهنتون د مالي او اداري چارو مرستیال ښاغلي مولوي معلم احمد، د محصلینو چارو سرپرست مرستیال نواب ګل اتل زی او د پوهنتون د نشراتو آمر ښاغلي رحیم الله ندیم په حضور کې تصدیق پاڼې ووېشل شوې.
د پوهنتون مالي او اداري مرستیال د محصلینو د خدمتونو د انسجام آمریت له دې کار څخه ستاینه وکړه اوهغه یې د محصلینو د وړتیاوو په لوړولو او هڅونه کې ګټور وباله او په پوهنتون کې یې د اسلامي اصولو او آدابو په رعایت تاکید وکړ.
د څېړنې مېتود روزنیز پروګرام د یوې میاشتې لپاره او د کاري وړتیاوو د زده کړې پروګرام د دوه اونیو لپاره په لاره اچول شوی و او په پام کې ده، چې په راتلونکي کې د زده کړیالانو لپاره د محصلینو د خدمتونود انسجام آمریت له لوري ورته برنامې جوړې شي.
