د وترنري علومو پوهنځي نوی رئیس معرفي شو
د لوړو زده کړو وزارت د وړاندیز او د ا.ا.ا، ریاست الوزراء مقام د منظورۍ په اساس ښاغلی ډاکټر شېرعلي د وترنري علومو پوهنځي د نوي رئیس په توګه وټاکل شو.
د کابل پوهنتون رئیس ښاغلي دکتور اسامه عزیز د ډاکټر شېرعلي د معرفي کولو په مهال په دولتي څانګو کې تغیرات یو اصل یاد کړ او ویې ویل، چې دنده د شریعت له نظره یو مسئولیت او امانت دی. او له نېکه مرغه د ښاغلي پوهاند ډاکټر شېرشاه سادات په وخت د وترنري علومو په پوهنځي کې ښې کړنې تر سره شوېدي او هیله لرو چې دا کړنې د ښاغلي ډاکټر شېرعلي تر مدیریت لاندې هم دوام او لاغښتلې شي.
سره له د دې وترنري علومو پوهنځي نوي رئیس ډاکټر شېرعلي د لوړو زده کړو وزارت او د کابل پوهنتون د رهبرۍ له باور څخه مننه وکړه او ویې ویل، چې د استادانوپه همکارۍ د اصولو او قوانینو په رڼا کې همدارنګه د پوهنتون د مشرتابه په لارښوونه به د پوهنځي کمي او کیفي حالت په برخه کې د لا ښه کېدو زیار وباسي.
د وترنري علومو پوهنځي پخواني رئیس ښاغلي پوهاند ډاکټر شېرشاه سادات ښاغلي ډاکټر شېرعلي ته د ریاست مبارکي وویله او زیاته یې کړه چې د پوهنځي د ښه والي په برخه کې له نوي مشرتابه سره هر ډول همکاری ته چمتو دی.
ډاکټر شېرعلي د عبدالرزاق زوی، د ننګرهار پوهنتون د وترنري علومو له پوهنځي څخه د لسانس سند لري او د ترکیې هېواد د سامسون پوهنتون څخه یې د حیواني علومو په برخه کې د ماسټرۍ دیپلوم تر لاسه کړی دی.
