د افغانستان لپاره د ملګرو ملتونو ادارې ځانګړې سیاسي استازي د کابل پوهنتون له رییس سره وکتل
د افغانستان لپاره د ملګرو ملتونو د ادارې سرمنشي ځانګړي استازي سیاسي مرستیالې مېرمن میته کنسود سن او مل استازي د روان کال د کب په ۲۵ د چهارشنبې په ورځ د کابل پوهنتون رییس ښاغلي دکتور اسامه عزیز ، د دې پوهنتون استادانو او محصلینو سره وکتل او د پوهنتون د رسمي درسونو په پیل یې خوښي وښوده او دا یې په افغانستان کې د پراختیا او پرمختګ په برخه کې مثبت ګام یاد کړ.
مېرمن کنسود سن زیاته کړه، ملګري ملتونه هڅه کوي، چې په علمي او اکاډمیکه او همدارنګه مالي برخه کې کابل پوهنتون سره مرسته وکړي او مرسته کوونکي هیوادونه وهڅوي، ترڅو ځانګړې پاملرنه وکړي.
همدارنګه د کابل پوهنتون رییس ښاغلي دکتور اسامه عزیز د افغانستان لپاره د ملګرو ملتون ادارې سرمنشي ځانګړې سیاسي استازې او مل پلاوي ته د ښه راغلاست ترڅنګ وویل، چې کابل پوهنتون یو لوی او تاریخي پوهنتون دی او پدې پوهنتون کې درسونه په عادي ډول پيل شوي دي او داسې کومې جدي ستونزې وجود نلري، چې د نجونو یا هلکانو د تحصیل او زده کړو پر وړاندې مانع وګرځي او مونږ هیله لرو، چې نړۍ واله ټولنه په ځانګړي توګه ملګري ملتونه پدې مسئله پوهه شي او د هیواد د لوړو زده کړو د هغې له ډلې کابل پوهنتون ته زیاته پاملرنه وکړي. د کابل پوهنتون رییس د افغانستان لپاره د ملګرو ملتونو ادارې سرمنشي ځانګړې سیاسي استازې څخه وغوښتل، چې نړۍ واله ټولنه باید له تحصیلي او تعلیمي مسایلو سره سیاسي چلند ونکړي؛ ځکه تحصیل او تعلیم د هر افغان حق دی، چې باید دې حق ته په درناوي قایل شو او پدې برخه کې همکاري له سیاسي ستونزو او د رسمیت پېژندنې له موضوع سره ګډه نشي.
همدارنګه پدې لیدنه کې د کابل پوهنتون استادانو او محصلینو د افغانستان لپاره د ملګرو ملتونو ادارې سرمنشي ځانګړې سیاسي استازې سره خپلې ستونزې او غوښتنې شریکې او پدې برخه کې یې د مرستې غوښتنه وکړه، چې د مېرمن کنسود او مل پلاوي له لوري ورته د همکاري وعده ورکړل شوه.
