په کابل پوهنتون کې د ډیجیټلي مشکلاتو د حل او خلاقیت مرکز پرانېستل شو
دغه مرکز چې د کمپیوتر ساینس پوهنځي د محصلینو او استادانو په نوښت سره رامنځ ته شوی د روان کال مرغومي میاشتې په څلورمه نېټه د یکشنبې ورځ د پوهنتون د رهبري په شتون کې پرانیستل شو.
لومړی د کمپیوټر ساینس پوهنځي رئیس ښاغلي پوهنوال امیرکروړ شهیدزي د یادې پوهنځي د کړنو په هر اړخیز معلومات وړاندې کړل او د پوهنتون له رهبرۍ څخه یې د لا زیات ملاتړ او همکارۍ غوښتنه وکړه.
وروسته د کمپیوترساینس پوهنځي استاد ښاغلي پوهنیار سید نجم الدین سادات ددغه مرکز اړوند محتوا، کړنو، ځانګړتیاوو او پدې برخه کې د پلان شویو پروګرامونو په اړه خبرې وکړې او ټینګار یې وکړ چې ددغه مرکز اصلي موخه د محصلینو ظرفیت لوړول دي.
ورپسې د کابل پوهنتون رئیس ښاغلي دکتور اسامه عزیز ددغه ډول مرکز شتون د پوهنتون لپاره اړین وباله او زیاته یې کړه چې پدغه مرکز کې د محصلینو انفرادي هڅې په یو منظم چوکاټ کې په جمعي بڼه په لاره اچول کېږي او ورڅخه د علمي او څېړنیزو مسایلو د پرمختګ او توسعې په موخه استفاده کېږي.
پدغه پروګرام کې د پوهنتون د محصلانو چارو معاونیت سرپرست ښاغلي پوهنمل معاذ الله نسیم او د تحقیقاتو آمریت آمر ښاغلي پوهندوی محمدولي سالاري هم خبرې وکړې.
