د کابل پوهنتون له ۲۲ پوهنځیو څخه ۲۳۰۸ تنه محصلین د ليسانس په کچه فارغ شول
په همدې مناسبت جوړه شوې فراغتغونډه کې د ا.ا.ا لوړپوړو چارواکو، د مرکزي پوهنتونونو رهبرۍ، دیني عالمانو، استادانو، محصلینو او د دوی د کورنیو غړو حضور درلود.
د کابل پوهنتون رئیس، دوکتور اسامه عزیز، د غونډې پرانیستې وینا پرمهال د مبارکۍ ترڅنګ محصلين خپلو مسؤوليتونو ته متوجه کړل، د زده کړو دوام ته يې وهڅول، په علمي ډګر کې د کابل پوهنتون پر وروستيو پرمختګونو يې رڼا واچوله او همدا راز يې د هيواد د علمي مراکزو پر پياوړتيا او د علم پر ګټور استعمال ټينګار وکړ.
د لوړو زده کړو وزیر، شیخ الحدیث مولوي ندا.-محمد.-ندیم صاحب، په خپلې وینا کې وویل، دیني او عصري زده کړې د هېواد ابادۍ لپاره اړینې دي، همدارنګه يې له محصلینو غوښتنه وکړه چې له خپلو زده کړو څخه په استفادي اسلام او هېواد ته په خپله برخه کې خدمت وکړي.
د ریاست.الوزرا اداري مرستیال مولوي عبد.السلام حنفي صاحب د خپلو خبرو په جریان کې له فارغو محصلینو څخه غوښتنه وکړه چې له خپل تحصیل څخه د هېواد په بیارغونه کې اعظمي استفاده وکړي، ده همدا رنګه وویل چې اسلامي نظام د ځوانانو لپاره د خدمت فرصتونه برابروي.
د ریاست.الوزرا سیاسي مرستیال مولوي عبد.الکبیر صاحب په خپله وينا کې د کابل پوهنتون ځانګري علمي او تاريخي حيثيت ته اشاره وکړه او له دې پوهنتون څخه فارغ التحصيل محصلینو یې وغوښتل چې د هېواد ابادۍ کې فعاله ونډه واخلي. نوموړي د کابل پوهنتون د ٢٢ پوهنځیو ممتازو فارغو محصلینو ته ډالۍ ورکړې همدارنګه يې ځانګړې بلنه ورکړه چې په سپیدار ماڼۍ کې د دوی د فراغت او لیاقت په وياړ جوړيدونکې غونډه کې ګډون وکړي او ژمنه یې وکړه چې کوښښ کوي دوی ته د کار زمینه برابره کړي.
په پای کې ټولو فارغو محصلينو ته د پوهنتون د رهبرۍ لخوا ستایندړې او تصدیقپاڼې ورکړل شوې.
