د محصلینو له لوري څېړنیزې پروژې وړاندې شوې
په کابل پوهنتون کې د فزیک پوهنځي محصلینو له لوري د عملي کارونو پر دوام څېړنیزې پروژې وړاندې شوې، چې په دې تړاو جوړو شویو مراسمو کې د کابل پوهنتون رئیس دوکتور اسامه عزیز، د بېلابېلو پوهنځیو رئیسانو، استادانو او محصلینو برخه اخیستې وه.
د فزیک پوهنځي رئیس پوهنمل نورمحمد عزیزي د محصلینو لپاره څېړنیزې پروژې مهمې وبللې او ټینګار یې وکړ، چې د درسي بهیر ترڅنګ به محصلینو ته دا ډول د عملي کارونو زمینه برابروي ترڅو پر وینا یې محصلین وکړی شي له درسي بهیر څخه سمه اخیستنه وکړي.
د کابل پوهنتون د محصلانو چارو مرستيال استاد صلاح الدین ایوبي په خپلو خبرو کې، د محصلینو لپاره عملي کارونه اړین یاد کړل او زیاته یې کړه، چې د عصر له غوښتنو سره سم باید محصلین په مهمو موضوعاتو کې څېړنې وکړي او د ټولنې په پرمختګ او ځانبسیاینه کې خپل رول ولوبوي.
په پای کې د کابل پوهنتون رئیس دوکتور اسامه عزیز وینا وکړه، نوموړي د خپلې وینا پر مهال د محصلینو له لوري وړاندې شوي څېړنیز موضوعات مهم وبلل او محصلین یې وهڅول چې په ورته نورو برخو کې هم خپل خلاقیت پیاوړی کړي او د نظري درسونو ترڅنګ عملي کارونو ته هم پام وکړي. دغه راز یې محصلینو ته په خطاب کې وویل، چې پر خپلو وړتیاوو بشپړ باور ولري، له ظرفیتونو څخه سمه ګټه پورته کړي او دوی ته یی له خپل اړخ څخه د بشپړۍ همکارۍ ډاډ ورکړ.
