د ټولنیزو علومو پوهنځي کې د ماسټري د نویې برنامې رامنځ ته کېدو د نصاب په اړه د نظر شریکولو غونډه ترسره شوه
د کابل پوهنتون ټولنیزو علومو پوهنځي کې د افغانستان پېژندنې ماسټرۍ نوې برنامې د نصاب په اړه نظرونه واورېدل شول، د یادې برنامې د درسي مضامینو، مفرداتو او نصاب په اړه متخصصانو او کارپوهانو خپل نظریات او وړاندیزونه له مسئولینو سره شریک کړل.
پدغه غونډه کې د بهرنیو چارو، پوهنې، اطلاعات او فرهنګ وزارت د علومو اکاډمي او همدارنګه ښوونې او روزنې پوهنتون څېړونکو، کارپوهانو او د کابل پوهنتون د یادې رشتې اړوند پوهنځیو رئیسانو ګډون درلود.
غونډه د قرآن عظیم الشان په آیتونو پیل شوه، وروسته د ټولنیزو علومو پوهنځي استاد ښاغلي پوهاند عصمت الله عثماني د پوهنتون رئیس او راغلو مېلمنو له ګډون څخه د خوښۍ اومننې ترڅنګ د د دغه برنامې د ماسټرۍ رامنځ ته کیدو ته په اړتیا او ارزښت خبرې وکړې.
پدغه غونډه کې د کابل پوهنتون رئیس ښاغلي دکتور اسامه عزیز د موضوع اړوند خبرو کې د ټولنیزو علومو پوهنځي له هغه استادانو څخه هم مننه وکړه چې د ماسټرۍ په یاده برنامه کې هڅې کړې دي او یادونه یې وکړه، چې د لوړو زده کړو وزارت په څېړنو او علمي چارو پورې تړلی دی، د کابل پوهنتون هوډ لري تر څو د هیواد د مختلفوحوزو لکه د تاریخ په برخه کې متخصص، څېړونکي کادرونه وروزي.
وروسته د اوبو او انرژۍ وزارت ارشد مشاور ښاغلي داکتر فاروق اعظم د ماسټرۍ د یادې برنامې د رامنځ ته کېدو د اړتیا تر څنګ ټینګار وکړ چې نوموړې کړنه ځکه ارزښتناکه ده، چې په یاده برنامه کې د افغانستان د ټولنې د جوړښت په اړه علمي څیړنې تر سره کیږي.
د یادې غونډې په وروستیو کې د ماسټرۍ یادې برنامې د نصاب او مفرداتو په اړه ګډونوالو خپل نظریات او وړاندیزونه مطرح کړل، چې د مؤظفې کمېټې لخوا یاداښت شول ترڅو د یاد نصاب په برابرولو کې ترېنه ګټه واخلي.
