د ټولنیز کار ډيپارټمنټ

الف. پېژندنه:

د ارواپوهنې او روزنیزو علومو د پوهنځي د ټولنیز کار ډیپارټمنټ د علم او پوهې د پام وړ پرمختګ ته په پام او همدارنګه د ګران هېواد غوښتنو ته په کتو، د کاري او متخصص ځواک او د علم او فکر د تولید په هڅه کې دی چې د ټولنیز کار پنځه کلن لرلیدي پرمختیایي پلان یې له یو کلن ستراتېژیک پلان سره ترتیب او ترسیم کړی او د خپلو پرمختیایي پروګرامونو د ښه والي وړ حللارې یې موندلې دي، تر څو په دې برخه کې د کابل پوهنتون د نورو پوهنځیو او د هېواد په داخل او بهر کې د نورو لوړو زده کړو مؤسسو سره د باور وړ همکار او مرستندوی و اوسي او افغاني ټولنې ته د ځوانو او مسلکي کادرونو په وړاندې کولو سره د خدمت مصدر وګرځي.

که څه هم د ټولنيز کار ډیپارټمنټ تر خپلې وسې پورې په سختو حالاتو او شرایطو کې په لږو امکاناتو سره محصلینو او د پوهې مینه والو ته ارزښتمن خدمتونه وړاندې کړي دي؛ خو دې ډیپارټمنټ دا هڅې او خدمتونه کافي نه دي ګڼلي، د باکیفیته لوړو زده کړو د پرمختګ په برخه کې له نړیوالو معیارونو سره مطابق، نور جدي او اغېزناک کارونه او کړنې په پلان کې لري.

دا ډیپارټمنټ، له ټولنیزو مصیبتونو څخه د زیانمنو خلکو د لاسنیوي په منظور، د لوړو زده کړو، د کار او ټولنیزو چارو، شهیدانو او معلولینو وزارت او د یونیسف ادارې په مالي مرسته په ۱۳۹۳ کال کې جوړ شو، ترڅو ټولنې ته مسلکي ټولنیز کارکوونکي وړاندې کړي.

ب. موخې:

1. لیدلوری:

د اجتماعي کار ډیپارټمنټ د ارواپوهنې او روزنیزو علومو د پوهنځي یو له کلیدي او مهمو ډیپارټمنټونو څخه دی چې د یو علمي او ښوونیز مرکز په توګه د علمي او څېړنیزو فعالیتونو د سرته رسولو هڅه کوي، تر څو مسلکي کادرونه د ټولنیز کار په ډيپارټمنټ کې زیانمنو ته د مرستې لپاره ټولنې ته وړاندې کړي او د ټولنیزې هوساینې د منځ ته راتګ د زیانمنو ډلو، لکه: ماشومانو لپاره د ستراتېژیو په تدوین سره له دولت او پالیسي جوړونکو سره علمي همکاري او مرسته وکړي.

2. ماموریت:

د ارواپوهنې او روزنیزو علومو د اجتماعي کار ډيپارټمنټ رسالت او دنده لري چې معیاري ښوونیز خدمتونه وړاندې کړي، وړ ښوونیز فرصتونه برابر کړي، لوړې او کاراخیستونکې څېړنې ترسره کړي او د ټولنیزو کارکوونکو تر نامه لاندې ټولنې ته متخصص کادرونه وړاندې کړي.

د اجتماعي کار ډیپارټمنټ هڅه کوي چې د محصلینو تر منځ ښوونیزو او څېړنیزو فعالیتونو ته پراختیا ورکړي او معیاري یې کړي، همدارنګه په دې لټه کې دی چې د عملي یا سیمه ییز کار (Field Work Practice/IInternship/& Field Visit) زمینه محصلینو ته برابره کړي.

:3. اساسي موخې

د ټولنیز کار په ډيپارټمنټ کې د لیسانس او ماسټر په سویه د علمي کادرونو روزنه؛

د محصلینو او ټولنې غوښتنو ته په پام د باکیفیته ښوونیزو خدمتونو وړاندې کول؛

 د ګټورو او لوړو څېړنو د پراختیا او ترسره کولو لپاره د امکاناتو او اسانتیاوو برابرول ؛

د ډيپارټمنټ په کچه د زیربناوو او ښوونیزې ټکنالوژۍ پراختیا او را منځ ته کول؛

د ډیپارټمنټ د استادانو او محصلانو د ارزونې د سیسټم معیاري کول؛

د خوځنده او فعال ښوونیز سیسټم او میتودونو اصلاح او ښه والی؛

د ماشومانو د ساتنې او اجتماعي هوساینې له مؤسسو سره د اغېزناک ارتباط را منځ ته کول او د ټولنیزې هوساینې لپاره محصلانو ته د ساحوي کارونو د زمینې برابرول.

ج) تحصیلي نصاب (تخصصي مضمونونه)

ګڼه	د مضمون نوم	کودنمبر	کرېدېت	ګڼه	د مضمون نوم	کودنمبر	کرېدېت
1	د ټولنیز کار بنسټونه	BSW205	4	۱۶	د ټولنيز کار راپور لیکنه	BSW221	4
2	په اسلام کې د ماشومانو حقونه	BSW206	4	1۷	اجتماعي او اقتصادي پراختیا	BSW222	۲
3	له ماشومانو او زلمیو سره انساني چلن	BSW207	4	1۸	استوګنیز چاپیریال	BSW223	۲
4	ټولنیزه رنځپوهنه	BSW209	4	۱۹	د بشر حقونه	BSW224	۴
5	اجمتاعي کار او د ماشوم حقونه	BSW200	2	2۰	له مؤسسو لیدنه	BSW225	4
6	د ماشوم او مور روغتیایي پالنه	BSW213	2	2۱	په بېړنیو شرایطو کې د ماشومانو ساتنه او د بحران مدیریت	BSW228	2
۷	ټولنه، فرهنگ او پراختیا	BSW216	4	2۲	د ماشومانو سوکالي او هوساینه	BSW230	4
۸	له مؤسسو لیدنه	BSW219	4	2۳	سیمه ییز کار I	BSW231	4
۹	د ماشوم ساتنه	BSW220	2	۲۴	د ټولنیزې هوساینې پالیسي	BSW237	4
۱۰	له ماشومانو او نویو څوانانو سره مستقیم چلن	BSW232	2	۲۵	کارکوونکي ماشومان	BSW238	2
1۱	د اجتماعي هوساینې اداره	BSW233	۴	۲۶	اعیتاد او ماشومان	BSW240	2
۱۲	سوله او د ټولنیزو شخړو حل	BSW234	4	۲۷	ماشومان په وسله والو ډلو کې	BSW241	4
۱۳	سیمه ییز کار II	BSW226	4		په عدلي سیسټم کې د ماشوم لپاره عدالت غوښتنه	BSW229	2
۱۴	د لارې د سر د ماشومانو مطالعه	BSW243	2	۲۸	کار زده کړه Internship	BSW242	4
۱۵	پراختیا د سازمان مدیریت	BSW244	4	۲۹	مونوگراف (سمینار )	BSW246	4