د کابل پوهنتون د جديدالشمول محصلانو د ښه راغلاست غونډه جوړه شوه
د کابل پوهنتون د جديدالشمول محصلانو د ښه راغلاست غونډه د لوړو زده کړو محترم وزیر شيخ الحدیث مولوي نداء محمد ندیم صاحب په حضور کې د محصلانو معاونیت له لوري ترسره شوه.
په دې غونډه کې د عالیقدر امیرالمؤمنین -حفظه الله تعالی ورعاه- پیغام د کابل پوهنتون رئیس ښاغلي دکتور اسامه عزيز له لوري ولوستل شو، چې د پوهنتون مسؤولینو، استادانو، محصلانو او په ځانګړي ډول جديدالشمول محصلانو ته په کې مهمې سپارښتنې شوې وي.
د غونډې مشر مېلمه د لوړو زده کړو محترم وزیر جدید الشمول محصلانو ته مفصله وینا وکړه، او ويې ویل: د زمونږ ژوند هدف د الله تعالی عبادت دی او عبادت له علم پرته ناممکن دی. نوموړي له محصلانو وغوښتل چې پوهنتون خپل دوهم کور وګڼي، وخت ضایع نه کړي او په پوهنتون کې له هر ډول سیاسي او حزبي فعالیتونو څخه ډډه وکړي. نوموړي ټینګار وکړ چې محصلان باید خپل اصلي مسیر، چې د علم ترلاسه کول دي، تعقیب کړي او له پوهنتوني فرصتونو څخه د خپلې علمي او شخصي ودې لپاره اعظمي ګټه واخلي.
په دې غونډه کې د کابل پوهنتون رئيس ښاغلي دکتور اسامه عزيز نویو شامل شوو محصلانو ته د ښه راغلاست ترڅنګ په خپله وینا کې وویل: «پوهنتون د شخصیت جوړونې مرحله ده؛ هڅه وکړئ چې له دې فرصت څخه اعظمي استفاده وکړئ، خپل وخت تنظیم کړئ او خپل نیت یوازې د الله تعالی د رضا لپاره وګرځوئ».
د يادونې ده چې روان (١٤٠٥ش) تحصيلي کال کې شاوخوا ٣٨٠٠ نوي محصلان د کانکور له لارې کابل پوهنتون ته جذب شوي دي.
