"په افغانستان کې د حلالې غذا تولید، ستونزې او حللارې" علمي سيمينار جوړ شو
په کابل پوهنتون کې د «په افغانستان کې د حلالې غذا تولید، ستونزې او حللارې» تر عنوان لاندې علمي سیمینار جوړ شو. په دغه سیمینار کې د پوهنتون استادانو او محصلینو ګډون درلود.
د موضوع وړاندې کوونکی د زراعت پوهنځي رئیس ښاغلی پوهنمل صفيالله جوهر و، چې په خپلو خبرو کې یې د حلالې غذا د دیني اړخونو تر څنګ د روغتیا، اقتصاد، وارداتو او ټولنیز باور پر ارزښت ټینګار وکړ. نوموړي وویل چې د حلال سیستم یوازې په غذا پورې محدود نه دی، بلکې درمل، مالي چارو، سینګار وسایلو، لباس او سیاحت ته هم غځېږي.
د سيمينار په ترڅ کې يادونه وشوه چې افغانستان زیاتره غذایي توکي له بهر څخه واردوي، نو اړینه ده چې د هغوی د سرچینې، ترکیب او تولید د څارنې او کنټرول علمي سیستمونه فعال شي. همداراز وړاندیز وشو چې د هېواد په کچه د حلال ملي مرکز جوړ او د افغانستان حلال برنډ معرفي شي، څو د اسلامي هېواد په توګه د افغانستان تولیدات نړیوالو مارکېټونو ته په ښه توګه وړاندې شي. حلاله غذا یوازې ديني اړتیا نه، بلکې یو لوی اقتصادي فرصت یې هم وباله، ځکه نړیوال مارکېټ یې تریلیونونه ډالر ارزښت لري او اوس مهال په دې برخه کې غیر اسلامي هېوادونه مخکښ دي.
یاده دې وي چې تر دې وړاندې هم کابل پوهنتون ورته سيمينارونه ترسره کړي، څو اړونده بنسټونه د عملي اقداماتو لپاره د سلا مشورو پر لور وهڅوي.
