د پوهنځی د ماسټرۍ برنامې معرفي
د پښتو ډيپارټمنټ د ماسټرۍ پروګرام په ۱۳۵۵ کال کې د کابل پوهنتون د علمي شورا له لوري تایید شو. په ۱۳۵۶ل کال کې د پښتو ماسټرۍ لپاره له ۱۰۶ کسانو څخه ازموینه واخیستل شوه، چې له هغې جملې څخه یې شپږ کسان پښتو ماسټرۍ ته جذب شول او په ۱۳۵۷ کال کې په لومړي ځل د پښتو ماسټرۍ ټولګي پیل شو. په ۱۳۵۸ کال کې د دې ټولګي تر فراغت وروسته، پر افغانستان د شوروي لښکر له لوري یرغل وشو او د نورو علمي فعالیتونو له بندېدو سره د کابل پوهنتون د پښتو ډيپارټمنټ د ماسټرۍ پروګرام هم بند شو.
په ۱۳۶۷ کال کې د پښتو ډيپارټمنټ د ماسټرۍ پروګرام بیا پیل او دا ځل یې تر ۱۳۷۰ کال پورې دوام وکړ؛ خو پر هم دې کال په افغانستان کې د کورنیو جګړو له پیل سره یو ځل بیا د پښتو ډيپارټمنټ پروګرام بند شو. په ۱۳۸۵ کال کې د پښتو ډيپارټمنټ د ماسټرۍ پروګرام یو ځل بیا پیل شو، چې لا هم دوام لري او د لوړو زده وزارت د قانون او لایحو سره سم خپل فعالیت ترسره کوي. په دې موده کې د پښتو ډيپارټمنټ د ماسټرۍ پروګرام ټولنې ته د پښتو ژبې او ادب سلګونه متخصصان وړاندې کړي دي.