د فارمسي پوهنځي په مینی لب لابراتوارونو کې د درملو د کیفیت ارزونې څلورم پړاو پای ته ورسېد
د درملو د کیفیت ارزونې څلورم پړاو، چې د کابل پوهنتون او د پارتیسیپ مؤسسې د دفتر ترمنځ د ۲۰۲۱ کال د مارچ په میاشت کې د لاسلیک شوي تفاهم لیک په رڼا کې د کابل پوهنتون د فارمسي پوهنځي د مینی لب لابراتوارونو کې چې د ۱۴۰۱ هـ، ش کال د لیندۍ میاشتې په ۱۲مه نیټه پیل شوی وو د مرغومي میاشتې په ۱۱ مه نېټه پای ته ورسید.
پدې پړاو کې د ۱۹ قلمه درملو ارزونه وشوه چې ۳۲۵ نمونې پکې شاملې وې او دغه نمونې د مرکز او ولایتونو له ۳۴ روغتونونو څخه چې د ICRC دفتر لخوا تمویلېږي راټولې شوې وې.
پدې ارزونه کې انا لېستانو چې ټول د دې پوهنځي فارغان دي فعاله ونډه اخیستې وه.
د درملو د کیفیت ارزونې بهیر د دې پوهنځي د درملو د کیفیت د کنټرول څانګې د استادانو لخوا څارل کېده. پدې پړاو کې هم د تېرو پړاوونو په څېر د فارمسي پوهنځي د پنځم ټولګي محصلینو د مینی لب په مرسته د درملو ارزونې عملي زده کړې تر سره کړې. د ارزونې په پایله کې، 32 نمونې چې د ټولو نمونو ۱۰ سلنه جوړوي غیر معیاري پیژندل شوې دي.
